É un dos dous únicos proxectos de Ribeira Sacra que acceden ás axudas do Feaga á mellora da produción
19 feb 2020 . Actualizado ás 12:03 h.A Consellería de Medio Rural fixo pública a lista de adegas que recibiron subvencións para realizar investimentos destinados a mellorar a elaboración e comercialización dos produtos vitivinícolas. Repartíronse preto de dous millóns de euros entre un total de dezaseis beneficiarios. Estas subvencións, financiadas polo Fondo Europeo Agrícola de Garantía (Feaga), podían ser solicitadas por empresas, asociacións e organizacións de produtores, así como por organizacións interprofesionais, para sufragar custos de construción, adquisición ou mellora de bens inmobles ou compra de nova maquinaria e equipamentos.
Tres adegas pertencentes á denominación de orixe Rías Baixas son as que reciben as maiores axudas. Trátase de Martín Códax (753.395 euros), Pazo de Señoráns (247.331) e Viña Almirante (272.971). A subvención destinada a Adegas Moure, de Ribeira Sacra, ascende a 143.445 euros e é a quinta máis cuantiosa. Por diante está a Compaña de Viños de Tempo Rodríguez, que recibe 187.898 euros para a adega que acondiciona no Bibei, dentro da denominación de orixe Valdeorras. Outra adega de Ribeira Sacra, a de Rubén Moure, recibe unha axuda de 10.800 euros con cargo a esa mesma liña de apoio á mellora da elaboración.
O investimento no proxecto subvencionado por Medio Rural en Adegas Moure ascendeu a medio millón de euros e permitiu dotar á adega dun equipamento acorde coa súa nova liña de viños. «Buscamos unha liña propia e iso require medios para darlle forma. Por exemplo, dispor de depósitos que nos permitan facer fermentacións en aberto», explica Evaristo Rodríguez.
Entre o equipamento incorporado á adega figuran novos tanques troncocónicos de madeira, os máis utilizados actualmente para a fermentación entre as marcas punteiras. Tamén se instalaron novas prensas e equipos de frío, ademais dunha desgranadora para o seleccionado da uva.
As reformas permitirán, doutra banda, que as trasfegas do viño póidanse facer por gravidade e sen ter que empregar sistemas de bombeo. «O que buscamos é extremar o coidado dende a selección da uva ao proceso de elaboración para preservar os aromas e a frescura característica das nosas variedades», sinala o responsable da adega.
Adegas Moure ampliou nas últimas anadas o abano de elaboracións e o tipo de variedades que entran na súa elaboración, unha liña que terá continuidade este ano coa saída dun rosado de sousón. Entre os seus plans máis inmediatos figura a apertura dun bar de viños no novo miradoiro da adega que funcionará previsiblemente nas próximas vacacións de Semana Santa. Neste local poderanse degustar todas as súas marcas acompañadas de produtos gastronómicos da zona.
Rías Baixas é o único consello regulador que optou ás axudas para a promoción exterior
Medio Rural tamén deu a coñecer a repartición das axudas para a promoción do sector vitivinícola en terceiros países que se cofinancian a través do Feaga. Os beneficiarios están na súa maioría na denominación de orixe Rías Baixas, cuxo consello regulador é o único que se acolleu a estas subvencións. A consellería repartirá preto dun millón de euros para fomentar plans de exportacións.
Hai 23 empresas e entidades que reciben subvencións coas que financiar desde campañas publicitarias a misións comerciais, pasando por promocións en puntos de venda, catas, feiras, presentacións de produtos e seminarios e degustacións. As axudas están pensadas para dar a coñecer nos mercados exteriores os viños galegos con denominación de orixe ou indicación xeográfica protexidas.
Estados Unidos e Xapón
O máximo beneficiario da convocatoria deste ano é o consello regulador de Rías Baixas, que recibe unha axuda de 229.079 euros. Esta entidade conta cun intenso labor de promoción dos viños que ampara en diferentes países do mundo, desde Estados Unidos a Xapón. Tamén son desta denominación de orixe as adegas que máis axudas reciben: a cooperativa Martín Códax (158.690 euros), Terras Gauda (95.854 euros) e Pazo Pondal (80.454 euros).
En total, as empresas con sede na denominación de orixe do albariño copan máis da metade das subvencións.