A denominación de orixe estará presente este ano en feiras en Londres e Düsseldorf
14 ene 2020 . Actualizado ás 05:00 h.O consello regulador de Ribeira Sacra abriu este luns o calendario de actividades promocionais do 2020 cunha cata en Pamplona organizada en colaboración coa asociación navarra de catadoras, que contou coa presenza do presidente da denominación de orixe, José Manuel Rodríguez. A seguinte cita do calendario promocional deste ano será na feira internacional do turismo que se celebrará en Madrid entre os días 22 e 26 de xaneiro.
Ribeira Sacra tamén ten previsto estar presente entre os días 6 e 9 de febreiro na feira gastronómica Xantar, que terá lugar nesas datas en Ourense. Ese mesmo mes, unha representación do consello regulador viaxará a Londres para participar na feira que organiza a revista de viños Decanter. En marzo estará na feira Prowein, en Düsseldorf, e en Madrid no Salón Gourmets.
Valoración da colleita
Doutra banda, o consello regulador puxo data á cata de cualificación que valorará os viños da última colleita en Ribeira Sacra. Cada ano ten a súa sede nalgún dos municipios acollidos á denominación de orixe e nesta ocasión celebrarase en Portomarín. A data escollida é a do 28 de febreiro.