A Deputación prepara varias iniciativas de cara ao 2020
19 dic 2019 . Actualizado ás 05:00 h.A Deputación prevé desenvolver durante o ano próximo diversas iniciativas para potenciar o turismo científico baseado na observación do ceo nocturno nas serras do Courel e Os Ancares dentro dunha rede internacional promovida pola Fundación Starlight. Segundo o organismo provincial, ao longo do 2020 poranse en marcha «novas actividades e medidas para dinamizar esta proposta» que se irán anunciando a medida que se acheguen as datas de realización. Por agora, a Deputación non concretou en que consistirán estas accións.
A Fundación Starlight foi impulsada polo Instituto de Astrofísica de Canarias co fin de promover a protección do ceo estrelado contra a chamada contaminación lumínica e de fomentar as actividades divulgativas e turísticas relacionadas coa observación do firmamento. Dentro desta iniciativa crear unha rede de destinos turísticos caracterizados pola boa visibilidade dos ceos nocturnos na que, en Galicia, xa se integraron previamente os montes de Trevinca -no municipio valdeorrés da Veiga- e o parque nacional das Illas Atlánticas, que ingresaron previamente no 2015 e o 2016. Os destinos turísticos incluídos na rede Starlight están repartidos por diferentes comunidades españolas, pero tamén por Portugal, Chile e Canadá. A fundación, así mesmo, pode outorgar acreditacións a establecementos situados en áreas libres de contaminación lumínica e especialmente aptas para este tipo de turismo.
A iniciativa que pretende levar a cabo á Deputación se inscribeen o plan estratéxico de turismo que o organismo provincial puxo en marcha no 2017 e que seguirá desenvolvéndose durante o ano próximo. No plan tamén figuran actuacións para promocionar nas serras do Courel e Os Ancares o turismo etnográfico e o ecoturismo, ademais do turismo científico. Dentro desta última iniciativa, o territorio recibiu o pasado marzo o selo de calidade que concede a plataforma Observer, que o acredita como un destino adecuado para o turismo científico. Este distintivo aplícase á área que forman os municipios do Courel, Quiroga, Ribas de Sil, A Pobra do Brollón, O Incio, Samos, Pedrafita do Cebreiro, Cervantes, Becerreá, As Nogais, Triacastela, Navia de Suarna, Baleira, Ribeira de Piquín, A Fonsagrada e Negueira de Muñiz.
Melloras nas rutas fluviais
Doutra banda, a Deputación está estudando a realización dunha serie de cambios nas rutas turísticas fluviais da Ribeira Sacra coa finalidade de «mellorar ou servizo e facelo máis atractivo», segundo precisaron desde o organismo provincial. As accións que levarán a cabo con este obxectivo daranse a coñecer antes do inicio da nova tempada, que comezará a fin de semana previa á Semana Santa. As reservas de billetes para estas rutas poderán realizarse unha vez que teña rematado o período do Nadal.