O goberno local inicia unha serie de actividades que seguirán ata decembro
20 novs 2019 . Actualizado ás 12:16 h.O Concello de Monforte animou ás empresas e axentes sociais e económicos do municipio a sumarse á campaña «En negro contra a violencia», que se desenvolverá entre este mes e o próximo e comprenderá diversas actividades. Con este fin repartiranse carteis coa lenda «Monforte en negro» entre os comercios e negocios de hostalería, e materiais como bolsas de tea, manteis de papel, posavasos, chapas e pulseiras entre os axentes sociais e económicos que o soliciten.
A campaña, que se desenvolverá en numerosos municipios galegos baixo o lema xeral de «En negro contra as violencias», foi presentada onte polo alcalde José Tomei, a tenente de alcalde Gloria Prada e a concelleira de Muller e Igualdade, Margarita López. O rexedor apuntou a este respecto que «a situación actual require dunha resposta unánime de toda a sociedade monfortina que poña de manifesto o rexeitamento de todas as formas de violencia contra as mulleres». Ademais dunha concentración que se celebrará ante a casa consistorial o día 25 -ás 12.00 horas-, a campaña comprenderá as iniciativa que se detallan a continuación.
Curso de autodefensa para mulleres. Será impartido no centro cívico do paseo do Malecón os días 22 e 29, de 10.00 a 14.00 horas, e ten o obxectivo de proporcionar ás participantes coñecementos básicos de defensa persoal e prevención de situacións de violencia sexista.
Charlas para estudantes. O día 27 haberá charlas informativas sobre agresións sexuais e violencia machista a cargo de Angélica Mercado, docente con experiencia en políticas de igualdade, que se dirixirán a alumnnos de cuarto curso de ESO de todos os centros educativos do municipio. Ofreceranse en dúas sesións, que empezarán ás 10.00 e ás 120.00 horas respectivamente.
Obra teatral. A compaña Redrum Teatro representará a obra Invisibles o día 28 no auditorio do edificio multiusos, a partir das 20.15 horas. A entrada custa cinco euros, que se reducen a tres para estudantes, desempregados e xubilados. A peza está baseada nun libro homónimo de Montse Fajardo.
Mesa coordinadora. O día 29, ás 11.30 horas, comezará no centro cívico unha reunión da mesa local de coordinación para a mellora da atención ás vítimas da violencia machista, formada por profesionais de diferentes áreas, como a seguridade pública, a xustiza, a sanidade, a educación e o ferrocarril.
Xornada formativa. O 13 de decembro, ás 12.30 horas, ofrecerase no salón do plenos da casa consistorial unha charla formativa sobre a prevención do acoso sexual no ámbito da administración municipal. A actividade diríxese ao persoal municipal e político do Concello e basearase nunha guía que foi publicada en xuño.
O alcalde animou
ás empresas
e axentes sociais
a apoiar estas accións
O Concello de Sober súmase á iniciativa con numerosos carteis
A campaña «En negro contra as violencias» desenvolverase tamén no Concello de Sober. O goberno local comprometeuse a difundila tanto nas dependencias municipais como nos centros educativos e nos establecementos comerciais. Os carteis co lema «Sober en negro» xa foron colocados en diferentes puntos da casa consistorial, a biblioteca municipal, a oficina de turismo, a aula de informática e o centro de saúde. O alcalde, Luis Fernández Guitián, sinalou que a intención do goberno local é «facer a todo o mundo partícipe da iniciativa para tomar conciencia da importancia de rematar con esta lacra que non cesa».
As campañas «En negro contra as violencias» empezaron a desenvolverse no 2015 en Santiado por iniciativa da administración local e desde entón se han ir estendendo paulatinamente a outros municipios galegos. As accións deste tipo intensifícanse durante novembro, xa que o 25 deste mes conmemórase o día internacional da eliminación da violencia contra a muller.
A esta iniciativa poden sumarse non só os concellos, senón tamén todo tipo de empresas, colectivos e axentes sociais. Os interesados poden apuntarse na páxina web ennegrocontraasviolencias.gal e solicitar permiso para empregar os logos que se utilizan nestas accións, de forma xenérica ou personalizada. Nestas campañas utilízase como motivo xeneral a cor negra e o loito.