Buscan adegas interesadas en exportar os seus viños e hoxe estarán en Regina Viarum e Adega Cachín
23 may 2019 . Actualizado ás 19:59 h.O consello regulador de Ribeira Sacra recibiu aos integrantes dunha misión comercial organizada polo Icex que busca abrir mercado a viños españois en Finlandia e Estonia . Na iniciativa promovida por este organismo colabora a oficina económica e comercial de España en Helsinqui. Os participantes na visita recibiron información sobre as características da denominación de orixe e tiveron a oportunidade de contrastalas nunha cata no Centro do Viño.
Este xoves visitaron algunhas das adegas que poderían estar interesadas. Na súa axenda figuran Regina Viarum e Adegas Cachín. Os integrantes da misión comercial pediron visitar en Galicia as denominacións Rías Baixas, Ribeiro e Ribeira Sacra.
Na misión comercial participan Lynda Ellen Coogan, experta en viños e gastronomía; Kristjan Markii, presidente da asociación de catadoras de Estonia e organizador de eventos sobre viños nese país; e Aivar Vipper, catador e articulista en publicacións especializadas.
Publicacións especializadas
Tamén se desprazaron á Ribeira Sacra Sanna Maskulin, redactora da revista de moda e estilo de vida de máis difusión en Finlandia; Sanna Pöyry, xornalista que asina habitualmente reportaxes sobre viños; Sami Repo, fotógrafo especializado en reportaxes de gastronomía; e Leena Nyrhi, analista de mercado da oficina comercial de Helsinqui.
A presenza dos catadores e xornalistas gastronómicos que integran a misión comercial prodúcese nunha semana na que tamén pasaron pola Ribeira Sacra catadores do monopolio estatal que regula a importación de viños en Noruega . Neste caso estiveron en Algueira e a SAT Virxe dous Remedios, onde elabora os seus viños Antonio Lombardía á espera do seu anunciado traslado a Sober.
Segundo os datos que se poden consultar na web do consello regulador, na pasada campaña exportáronse a Finlandia 7.200 litros de viños de Ribeira Sacra. Ningunha adega da denominación de orixe exporta na actualidade a Estonia . Polo que respecta a Noruega , é curiosamente un dos destinos preferente das vendas de Ribeira Sacra. O ano pasado comercializáronse nese país 13.350 litros co seu contraetiqueta.