O cociñeiro lucense Héctor López deu unha demostración de harmonías entre viños e carnes en Gourmets
09 abr 2019 . Actualizado ás 19:12 h.A palabra maridaxe instalouse na linguaxe do viño. Maridar, por exemplo, é elixir un tinto para carne ou un branco para acompañar un marisco. Pero tamén pode selo optar xustamente pola combinación contraria. Dise que sobre gustos non hai nada escrito e hai quen prefire romper moldes á hora de harmonizar pratos e viños. Héctor López, cociñeiro do restaurante lucense España, xogou sen risco no taller gastronómico que dirixiu no marco do Salón de Gourmets. Sobre a mesa, tintos de Ribeira Sacra e carnes de vacún galegas con indicativo de calidade.
Héctor López é un dos catro chefs galegos que imparten este tipo de talleres no salón gastronómico que se celebra esta semana en Madrid. En todas as demostracións, realizan preparacións de carne de vacún con selo de calidade que logo poden ser degustadas polo público acompañadas por tintos de Ribeira Sacra.
«Danse a coñecer aos asistentes as peculiaridades e características do viño e a viticultura da Ribeira Sacra, e ao mesmo tempo promociónanse produtos galegos con indicativo de calidade», sinalan no consello regulador da denominación de orixe.
Para as degustacións de tenreira, vaca e boi galego no Salón Gourmets elixíronse exclusivamente tintos de Ribeira Sacra. «Son viños espectaculares para ese tipo de carnes, sobre todo en cortes que buscan sabores non demasiado fortes», apunta o cociñeiro do restaurante España. O corte e o período de maduración son fundamentais no perfil gustativo que adquiren estas carnes ao preparalas. Moi especialmente no boi, que moitos comensais asocian a sabores especialmente intensos. «A xente que vén probar carne de boi ao restaurante queda sorprendida. Se a carne foi ben madurada, o sabor é moi suave. A diferenza é que o gusto é máis persistente, queda máis tempo na boca», explica.
Criadeiro propio
Un criadeiro propio situado en Portomarín, acollido á indicación xeográfica protexida Vaca e Boi de Galicia, abastece de carne ao restaurante lucense. Na súa demostración no Salón Gourmets, Héctor López elixiu preparacións moi sinxelas co fin de dar protagonismo á materia prima. Tamén foi a forma de conseguir que harmonizase cos tintos frescos e froiteiros de Ribeira Sacra.
«Na grella nunca buscamos unha carne moi marcada polo fume, que combinaría mellor con tintos de máis crianza. Preferimos preparacións máis suaves para as que son perfectos os tintos de Ribeira Sacra, viños que baixan ben, frescos e que limpan a boca», di o cociñeiro.
Ribeira Sacra abriu o luns e pechará este xoves no Salón Gourmets o programa de degustacións Galicia: 35 experiencias de calidade, que serve para promocionar viños e outros produtos amparados por indicativos de calidade. A feira gastronómica que se celebra en Madrid conta co apoio do Instituto Español de Comercio Exterior e atrae a xefes de compras de restaurantes e cadeas de todo o mundo interesados en produtos de alta gama.
Dentro das campañas de internacionalización que programou para este ano, o consello regulador de Ribeira Sacra estará presente o próximo mes de maio na cidade francesa de Bordeus na feira Vinexpo.