Medio Ambiente elaborará un estudo sobre o impacto destas aves migratorias nos ríos
04 feb 2019 . Actualizado ás 05:00 h.A persecución que sufriu o corvo mariño grande nos anos sesenta e setenta é historia. Agora está protexido e pode alimentarse de peces ás súas anchas nos ríos nos que inverna. Os pescadores poñen o berro no ceo e piden á administración medidas para controlar as poboacións destas aves. Os biólogos, pola contra, creen que o impacto que poida supor a recuperación deste especie é moito menor que o derivado da baixa calidade das augas. Sen un estudo previo, en todo caso, non se pode actuar sobre ela.
A elaboración dese tipo de estudos é unha reivindicación dos pescadores de Galicia e Asturias. En marzo do 2017 reuníronse na Pontenova para reclamar medidas urxentes fronte á «sobrepoblación» destas aves. Polo menos en Galicia, parece que as queixas non caeron en saco roto. No último comité provincial de pesca, os representantes da Consellería de Medio Ambiente comprometéronse a realizar un informe para calibrar o impacto real do corvo mariño grande nos ríos.
Oficialmente, a consellería nin o confirma nin o desmente. Os representantes das asociacións de pesca que acudiron ao comité de pesca previo á tempada aseguran que houbo un compromiso explícito, aínda que sen unha data para a súa presentación. Os colectivos de pescadores afirman que os esforzos para repoboar varios ríos da provincia hanse visto frustrados pola chegada masiva de corvos mariños.
Segundo os seus cálculos, a dieta diaria de cada unha destas aves non baixa dos cinco ou sete peces. Non existen, con todo, investigacións científicas que cuantifiquen o impacto destas aves migratorias -procedentes do norte e o centro de Europa- sobre as poboacións de salmónidos.