Cidadáns quere que non se autoricen casas de xogo preto de centros educativos
LEMOS
Cidadáns estréase no escenario político local. Por mediación da súa coordinadora na zona, Mercedes Marcos Fernández, rexistrou un escrito no Concello de Monforte no que pide que non se concedan licenzas de apertura de casas de apostas «nas inmediacións de centros escolares e xuvenís». A iniciativa responde a unha campaña de ámbito estatal que leva a cabo a formación política que lidera Albert Rivera. «Presentamos nos concellos unha serie de medidas para frear as altas cifras de ludopatía que se están rexistrando entre os máis novos», di Mercedes Marco.
Para Cidadáns, existe unha regulación «dispar» da normativa relativa ao xogo nas diferentes comunidades autónomas. Esta situación precisa ser mellorada, segundo o seu criterio, debido ao «aumento significativo de salas en toda España». A proposta rexistrada en Monforte faise eco dun estudo da Dirección Xeral de Ordenación do Xogo que pon de manifesto que a idade de inicio deste tipo de actividades en España é aos 21 anos.
Antes dos 18 anos
Outro dato significativo deste estudo é que un 36% dos enquisados afirma iniciarse no xogo antes dos 18 anos. Cidadáns pide o apoio das corporacións locais, explica a súa coordinadora en Monforte, para instar o Goberno «a traballar na prevención das condutas adictivas relacionadas co xogo». Nesa mesma liña, expón que se revise a normativa municipal para que sexa posible impedir a apertura de casas de apostas «en zonas con alto tránsito de menores de idade».
Mercedes Marco sinala ademais que o Concello debe pór en marcha, en colaboración coas forzas de seguridade, campañas de concienciación sobre os riscos do xogo dirixidas ás familias.
Cidadáns presentarase por vez primeira ás eleccións municipais en Monforte nos comicios do ano próximo. Ao non ter representantes na corporación, a súa proposta non pasará en principio polo pleno. Está en mans do alcalde tomala en consideración ou pedir para ela o apoio doutros grupos.