Dirixentes do partido sondan a simpatizantes polo menos en Sober e Folgoso
05 dic 2018 . Actualizado ás 21:18 h.Os máximos responsable de Cidadáns en Galicia desprazáronse onte a Monforte. Participaron nunha visita ás instalacións da asociación Prodeme e deron unha rolda de prensa na que, a preguntas dos xornalistas, deron algunhas pistas sobre o seu traballo de precampaña. Non revelaron o nome do seu candidato á alcaldía de Monforte, pero confirmaron que presentarán lista. E poida que non só en Monforte, senón tamén noutras desta comarca e do resto do sur da provincia.
Os líderes de Cidadáns que participaron na visita de onte son Olga Louzao, que ademais de concelleira en Lugo é a portavoz do partido en Galicia; e Laureano Bermejo, secretario de Organización en Galicia. Con eles deixouse ver por primeira vez nun acto público a coordinadora desta formación política en Monforte, Mercedes Marcos. O que falou sobre as eleccións municipais foi Bermejo, que non quixo revelar o nome do seu candidato á alcaldía de Monforte, aínda que deixou entrever que xa está elixido.
Lugo e A Mariña
Bermejo engadiu que Monforte podería non ser o único municipio no que o próximo mes de maio poderase votar a Cidadáns nas eleccións municipais. «Está a traballarse -asegura- na zona de Sober e hai pouco que tivemos unha reunión en Folgoso do Courel». No conxunto da provincia, tamén están a tratar de formar candidaturas en municipios dos arredores de Lugo, como Outeiro de Rei, e en diferentes puntos da Mariña.
O secretario de Organización de Cidadáns en Galicia engadiu ademais que están a crecer en implantación en toda Galicia, nalgunhas provincias con incrementos da afiliación de ata un 80 %.
A coordinadora local desta formación en Monforte é Mercedes Marcos
«En Monforte temos uns 45 afiliados, insuficientes para organizar eleccións primarias»
Salvo filtracións previas, o nome da persoa que encabezará a candidatura de Cidadáns nas eleccións municipais do próximo mes de maio non se coñecerá ata principios de xaneiro. A formación laranxa ten decidido dar a coñecer todos os nomes ao mesmo tempo. «Vai ser algo a nivel nacional», explica Laureano Bermejo.
Sobre Monforte, Bermejo deixou entrever que a decisión sobre o cabeza xa está tomada e aclarou que este nome non saíu, nin vai saír dun proceso de primarias internas, como si ocorrerá cos candidatos doutras localidades. A razón é que as normas de Cidadáns establecen que as primarias son necesarias só nas agrupacións locais que teñan polo menos catrocentos afiliados inscritos. No caso de Monforte, e segundo Bermejo, Cidadáns ten nestes momentos ao redor de 45 afiliados.
Un percorrido polas instalacións de Prodeme, que anuncia visitas guiadas en xaneiro
A visita a Monforte dos máximos responsables de Cidadáns en Galicia non tiña que ver coas eleccións municipais. Respondían a unha invitación efectuada por Prodeme, dentro da campaña desta asociación para dar a coñecer a súa actividade aos partidos políticos con implantación na provincia de Lugo. Prodeme ampliará en xaneiro esta invitación a todos os veciños de Monforte, aos que ofrecerá visitas guiadas ás súas instalacións.
Os tres representantes de Cidadáns que participaron neste encontro chegaron ás once da mañá ás instalacións de Prodeme na estrada de Currelos. Tras unha reunión con Julio Cortiñas, o xerente e portavoz da asociación, fixeron un percorrido polas dependencias da asociación, que dispón nesa zona dunha residencia, unha carnicería, un centro ocupacional e unha granxa de gando nos que viven e, na maior parte dos casos, traballan as 105 persoas con discapacidade intelectual aos que atenden nestes momentos.
Tras este encontro nas instalacións de Prodeme, Julio Cortiñas e os tres representantes de Cidadáns desprazáronse ao centro de Monforte para dar unha rolda de prensa no Hotel Cardenal. En declaracións aos medios de comunicación, Cortiñas explicou que tamén están invitados a visitalos o BNG, Esperta Monforte e os concelleiros non adscritos. E van invitar tamén aos sindicatos e ás organizacións empresariais. «Agardamos que algún día os señores do PSOE nos consideren merecedores dunha visita», lamentouse ironicamente Cortiñas.