Os expertos sosteñen que un inverno duro sería «o mellor insecticida»
18 novs 2018 . Actualizado ás 05:00 h.A maior ou menor proliferación de velutinas na próxima primavera non dependerá exclusivamente da destrución dos niños. Os expertos aseguran que a natureza tamén ten moito que dicir respecto diso. «Se o río volve conxelarse, será o mellor insecticida posible», di Juan Luis López Seoane, enxeñeiro de Tragsatec, área técnica de Tragsa, empresa á que a Xunta encomendou a retirada dos enxames desa especie invasora.
Do mesmo xeito que as esporas dos fungos que atacan ao viñedo, as larvas das raíñas de velutina dormen baixo terra na parada invernal. Non é que un inverno frío vaia a acabar coa especie, pero polo menos pode condicionar a súa capacidade reprodutora. Sumamente alta, segundo os especialistas. «Un enxame pode chegar a ter 1.800 avespas. A capacidade de reprodución da velutina é brutal. Nela está a clave do seu éxito», apunta López Seoane.
Estes e outros aspectos curiosos saíron a relucir na charla sobre a avespa asiática impartida prol este técnico, que organizou o Concello de Monforte en colaboración coa Consellería de Medio Ambiente. A velutina parece ter chegado para quedar e na charla quedou de manifesto que haberá que aprender a convivir con ela. «Son 150.000 os avisos atendidos e cóntanse cos dedos da man os accidentes de gravidade», sostén o representante de Tragsatec.
Unha das «vantaxes» da velutina radica, segundo explica, na súa tendencia a construír os niños en altura: «Buscan sitios menos accesibles e iso fai que o risco de ataque sexa menor». Convén, en todo caso, inspeccionar moi ben os terreos que se van limpar antes de acender unha rozadora. Aínda que non afecte directamente ao niño, incluso o ruído pode propiciar un ataque.
Polo que parece, a velutina non é máis agresiva que outras avespas que poderían catalogarse como autóctonas. Os aparatosos traxes que se utilizan nos seus niños pode dar esa impresión, pero a causa de que se utilicen é outra. «O veleno é igual, pero o aguillón e máis longo do normal», di este técnico.