A recente preocupación chinesa polo medio ambiente dá un respiro á empresa
06 dic 2017 . Actualizado ás 05:00 h.Traballadores e directivos de Magnesitas de Rubián celebraron onte cunha comida en Sarria a festividade de Santa Bárbara, a patroa da minería. A empresa encaraba o ano 2017 con medo aos efectos da eliminación que entrou en vigor en xaneiro das restricións comunitarias ás importacións procedentes de China , o primeiro produtor mundial de magnesita. Pero a nova política chinesa de control da industria máis contaminante limitou a capacidade exportadora do xigante asiático e o golpe que agardaba a industria europea de extracción de mineral de carbonato magnésico non se produciu. Na empresa con mina e fábrica no municipio do Incio admiten que o mercado se mantivo estable este ano e que eles seguen exportando fóra da Península Ibérica o 80% do que producen.
«Ese 80% de produto exportado é o habitual para nós», explicaba onte o director xeral da empresa, Eduardo Jiménez, durante a visita polas instalacións desta firma na parroquia de Rubián de Cima, na que exerceu de guía de políticos como o delegado da Xunta en Lugo, José Manuel Balseiro, e o subdelegado do goberno, Ramón Carballo; e de personalidades da vida pública como o presidente da Audiencia Provincial, José Antonio Varela Agrelo. Esta estabilidade en tempos que se prevían malos é unha excelente noticia para o sector en xeral e para Magnesitas de Rubián en particular.
Eduardo Jiménez non quere proporcionar cifras concretas sobre os últimos datos de facturación económica da empresa, pero confirma que o seu mercado exterior segue estando fundamentalmente no que el denomina a franxa verde de Europa, que inclúe as illas británicas, o norte de Francia, os Países Baixos, o sur de Alemaña e Suíza.
A maior parte da produción que sae de Rubián de Cima a compra, como desde os inicios da empresa nos anos 60, a industria de elaboración de pensos para gañado. Esa produción acapara aproximadamente o 80% das vendas, mentres que o mineral que suma o 20% restante destínase a fertilizantes.
Esta actividade emprega a cincuenta persoas, entre a fábrica e a zona de extracción
Magnesitas de Rubián é unha sociedade cuxa propiedade está dividida entre a madrileña familia Fierro e a empresa Promotora de Minas de Carbón (PMC). Ademais, a segunda é a que se encarga de explotar para Magnesitas a mina escavada baixo a vila de Castelo, a uns poucos centos de metros das instalacións da fábrica e as oficinas nas que a empresa ten a súa sede social. Entre as oficinas, a fábrica e a mina, esta actividade mineira emprega de forma directa a medio centenar de persoas.
Deste persoal, unha quincena son traballadores de PMC e ocúpanse da extracción do mineral das galerías escavadas no subsolo de Rubián de Cima. Os outros 34 forman parte do persoal de Magnesitas e traballan nas oficinas e a fábrica. A sección con máis persoal é a que atende o forno que calcina o mineral para o seu uso comercial, na que traballan doce persoas.