Ata nove canles da conca Miño-Sil entran no outono cun nivel por baixo do habitual
24 sep 2017 . Actualizado ás 05:00 h.Os ríos que xestiona a Confederación Hidrográfica Miño-Sil están baixo mínimos. Tres deles, segundo os datos que manexa o organismo do Ministerio de Medio Ambiente, levan un caudal moi baixo, con valores inferiores aos dez centímetros de nivel e con caudais con metros cúbicos por baixo da media. Trátase dos ríos Narla, en Gondai; Sarria, na Pobra de San Xiao; e Neira, no Páramo. Ademais, hai outros oito puntos de detención de seis ríos (Miño, Azúmara, Ladra, Cabe, Lor e Parga) con niveis baixos (ver cadro adxunto).
As reservas hidrolóxicas da conca do Miño-Sil atópanse nun 50%, cando hai xusto un ano estaban no 53,1%, un dato que no seu momento xa marcaba unha situación crítica de perigo de seca. Por estes datos actuais, a Confederación Hidrográfica mantén a situación de prealerta por seca, pero como pasen máis días sen precipitacións de certa relevancia, en outubro poderíase activar a alerta, o que implicaría unha serie de restricións e recomendacións aos concellos aínda maiores das actuais.
Esta semana, Meteogalicia emitía o seu informe sobre o verán, destacando que fora moi seco, con gran parte dos municipios do centro e o sur da provincia con precipitacións inferiores aos 100 litros por metro cadrado nos máis de 90 días do estío. Só A Mariña, Os Ancares e O Courel tiveron cifras de choiva por amais dos 100.
Pero a modo de exemplo, a estación meteorolóxica do Campus de Lugo rexistrou no verán 73 litros por metro cadrado. A choiva pasou dun litro en só 15 días e só houbo unha xornada, en agosto, onde choveu por amais dos 10 litros. O balance hídrico da capital (a diferenza da auga que entra e a que se marcha) é negativo desde abril. Este panorama está a deixar imaxes de ríos secos, pozos sen auga, traídas achicadas, prados sen verde e xardíns sen herba.