O consello regulador valorará o anuncio da Xunta cando coñeza máis detalles
23 sep 2017 . Actualizado ás 05:00 h.O pacto de silencio sobre a candidatura a Patrimonio da Humanidade xa non o é tanto. Fundamentalmente, porque a proposta deixou de ser en aparencia unha pataca quente para os alcaldes da Ribeira Sacra. Os detalles sobre a declaración de Ben de Interese Cultural (BIC) que transcenderon tras o último Consello da Xunta despexan a principal incógnita. Todo indica que esta figura de protección, á que se someterán amplas zonas de viñedo, só afectará de esguello á actividade vitícola.
A deputada do PP Raquel Arias destaca a importancia desta declaración, sen precedentes en Galicia, «para a promoción diferencial» da Ribeira Sacra como destino turístico. Pero sempre que sexa «completamente compatible» coa actividade do sector vitícola. «A viticultura heroica é outro motor económico para a zona e un elemento paisaxístico e medioambiental diferenciador que temos que coidar con mimo», precisa a exalcaldesa de Sober.
As declaracións sobre a transcendencia de que tería para a Ribeira Sacra a declaración de Patrimonio da Humanidade non sempre foron compartidas polo sector vitícola, artífice da candidatura coa recuperación do viñedo en bancales e tamén principal afectado pola declaración de BIC. «Non podemos expoñernos a ter que traballar a viña no día a día a expensas do que diga Patrimonio», opina o presidente da denominación de orixe, José Manuel Rodríguez.
A declaración de BIC implica que as novas construcións, as rehabilitacións integrais e todas aquelas actuacións que alteren a paisaxe de forma importante deberán ser autorizadas pola Dirección Xeral do Patrimonio Cultural. A Xunta avanza, no entanto, que quedan libre desa esixencia as actividades agrícolas tradicionais, incluído o viñedo «sempre que non supoña modificar os socalcos».
O consello regulador non se pronuncia de momento. Abordará esta cuestión cando coñeza todos os detalles, previsiblemente no pleno que fará balance da vendima. «Temos que ser cautos, xogámonos o futuro», di José Manuel Rodríguez.
Que significa exactamente non modificar os bancales?
A declaración de BIC implica unha diferenza substancial na autorización de obras en zonas de ribeira. Mentres unhas liquidaranse con licenza municipal, outras precisarán do permiso de Patrimonio. Este último só será preceptivo «cando se modifiquen os socalcos». Para o consello regulador, habería que acoutar con precisión que significa alterar os bancales. Nunha primeira lectura, Patrimonio só terciaría nas obras que alteren a configuración tradicional dun viñedo para que gañe anchura e facilitar así o paso de maquinaria. Pero tamén é certo, apuntan desde a denominación de orixe, que un raíl ou á colocación duns postes poderían entenderse como unha «modificación».
Os alcaldes dos vinte e un municipios incluídos na declaración de paisaxe cultural están citados o vindeiro mércores a unha reunión en Santiago na que coñecerán máis detalles do expediente. Luis Fernández Guitián, presidente do consorcio de turismo da Ribeira Sacra, acode ao encontro convencido de que a declaración de BIC será positiva para os viticultores. «O que se fai vaise seguir facendo, e esa consideración vai ser un estímulo para que a cultura do viñedo teña continuidade», apunta o rexedor de Sober.