O proxecto EuroVelo, que inclúe miles de quilómetros para percorrer sobre dúas rodas, tenta unir toda a costa galega a través dunha ruta
17 ene 2018 . Actualizado ás 05:00 h.A costa galega dende a desembocadura do Eo, pegada a Vegadeo (primeira poboación asturiana), ata Tui e mais unha vía que vaia dende Santiago e morra en Fisterra xuntándose á anterior. Ese é o proxecto que acaba de pór amais da mesa un grupo de seis asociacións de cicloturismo galego, a Coordinadora Galega da Bicicleta, e que pretende integrarse nun de dimensión europea chamado EuroVelo. En realidade, a segunda parte é continuación da proposta de EuroVelo, rematada sobre o papel, que uniría Ponferrada, en León, con Compostela.
Esa vía pola costa galega para bicicletas significa deseñar e preparar 866 quilómetros. No horizonte, non só ter un proxecto sustentable e de boa imaxe, senón tamén atraer a un turismo que adoita ser de alto poder adquisitivo. E máxime porque Portugal está traballando na mesma liña, e nun futuro próximo sería lóxico que o itinerario galego acabase en A Guarda e continuase por territorio luso a partir de Caminha, río Miño por medio.
EuroVelo existe dende 1997, un fillo da Federación de Ciclistas Europeos, que quere ter en total 70.000 quilómetros sinalizados en practicamente todos os países europeos. Se as cousas viñeran rodadas, a comezos da vindeira década estará presente tamén en Galicia.
En realidade, o proxecto non é tan irrealizable como a alguén lle puidese parecer a primeira vista. A Unión Europea ten en carteira un sendeiro litoral (o E09, GR-11 ou Sendeiro Atlántico) que une San Petersburgo (Rusia) co cabo San Vicente (Portugal). En moitos países hai anacos feitos e outros en obras. Mesmo en territorio luso toda a costa suroeste ten máis dun cento de quilómetros sinalizados no que aló chaman a Rota Vicentina (que se prolonga polo interior), dende o propio cabo San Vicente ata Santiago do Cacém.
Galicia xa pode presumir de ter un anaco, o chamado Costa Ártabra, que une Cobas (Ferrol) co monte Campelo en Meirás (Valdoviño). Son máis dunha ducia de quilómetros que se fixeron pensando tamén nas bicicletas, a pesar de que unha costa só é para os que estean moi en forma.
A iso hai que lle sumar o gran labor que un grupo de voluntarios están facendo na Costa da Morte deseñando e promocionando a que con moita xustiza chaman a Ruta dos Faros. E, por certo, nesa ribeira coruñesa hai outro tramo: o que une Arou co faro de cabo Vilán. Impresionante.
«Gales está á vangarda»
> ENTREVISTA | CRISTINA BERNABÉ DIRECTORA DE VISITBRITAIN PARA O SUR DE EUROPA
«Gales está á vangarda» en canto á explotación turística sustentable dos seus 1.400 quilómetros de costa. E é que de norte a sur é posible percorrela por un sendeiro inaugurado no 2012 que mesmo cruza un parque nacional (o Pembrokeshire National Path, 299 quilómetros impresionantes). Moitos tramos son accesibles en bicicleta.
Cristina Bernabé, directora para o sur de Europa de VisitBritain (o organismo oficial de promoción do turismo británico) cre que Gales é «unha alfaia aínda descoñecida, cunha gastronomía digna de mención e unha gran cantidade de opcións para o turismo de aventura».
-E máis rendible o turismo de camiñantes ou o de ciclistas?
-Nós non podemos facer diferenza en termos de rendibilidade, cada viaxeiro busca un tipo de experiencia diferente.
-Pois atender a todos...
-É que por iso nos centramos moito na personalización, en que cada persoa que viaxe atope a súa propia Gran Bretaña.
-Por certo, por que en Gales non son tan populares as bicicletas de montaña como no norte de España?
-O turismo de bicicleta está experimentando un bum en toda Europa, aínda que no caso de España é destacado.
-Nótase en Gran Bretaña?
-Estase notando tamén, si, por iso os destinos deben responder a esta demanda creando conceptos adaptados como esta ruta ao longo da costa de Gales.
Os beneficios de ir en bicicleta
- Educativo: Ir en bicicleta é algo educativo. Edúcase o corpo dunha maneira xenérica, pero tamén o ollo, o olfacto (algo que indo nun coche é moi difícil) e o sentimento de pertenza a un grupo cando non se viaxe só, así como o respecto pola natureza.
- Deportivo: O ciclismo é xa un deporte de masas, como queda patente na Vuelta a España ou no Tour de Francia. É un exercicio moi saudable que fortalece a resistencia e ensancha os pulmóns. Sempre require de estiradas ao rematar, con especial atención ao lombo.
- Familiar: É un dos poucos deportes que se adoita practicar coa familia. As excursións familiares son habituais nos países do centro e o norte de Europa. Dende a Coordinadora Galega da Bicicleta pensan que esta faceta se potenciará de maneira espectacular se se crea a vía pola costa.
- Divertido: Sono practicamente todos os deportes, pero este esixe menos concentración ca outros, como por exemplo o tenis, onde o mínimo despiste implica perder. Aquí non se gaña nin se perde: gózase.
actividades
Enlaces que cómpre visitar
- En es.wikipedia escribe «Sendero de la costa de Gales».
- En prensaescuela.es vai á Noticia do día, selecciona abaixo Consultar outra data. Elixe o día 11 deste mes e atoparás dúas ducias de enlaces e máis actividades.
- Sobre Portugal e a Ruta Vicentina: losviajeros.com/noticias.php?n=1114
- Senda ártabra: http://bit.ly/2D8O62m, con tres vídeos, un de parapente, outro paisaxístico e outro do percorrido en bicicleta.
Para artistas:
Toda a clase pode coller mapas de anacos da costa galega (imprimíndoos dende Google Earth, por exemplo) e debuxar por grupos ou individualmente o traxecto do itinerario costeiro. Ollo: hai que ter en conta vivendas, industrias e zonas de especial protección como as marismas. Que iría vendo o ciclista polo tramo que debuxas?