Achan flotando no Pacífico un alixo de cocaína suficiente para satisfacer a demanda de Nova Zelandia durante 30 anos
INTERNACIONAL
Localizadas máis de 3,2 toneladas da droga que terían un valor no mercado negro de case 300 millóns de euros
08 feb 2023 . Actualizado ás 13:39 h.En metade do océano Pacífico. Aí estaba, en decenas de paquetes que flotaban sobre a auga, o impresionante alixo de cocaína detectado este mércores pola policía de Nova Zelandia que, se saíse ao mercado, tería satisfeito a demanda desta sustancia no país durante máis de «trinta anos». A cantidade atopada pesaba 3,2 toneladas e en circulación tería acadado un valor próximo aos 316 millóns de dólares (uns 294 traducidos a euros). Trátase do «descubrimento de drogas ilícitas máis importante» realizado polos servizos neozelandeses.
Os encargados de trasladar a cocaína, que estaba repartida en 81 paquetes, preocupáronse por camuflala para que non fose detectada. Sen éxito, en vista do resultado. A droga ía enganchada a unha rede e cuberta de cortizas amarelas, e fora colocada nun «punto de tránsito flotante» do océano Pacífico, onde os traficantes terían que recuperala. «Pensamos que estaba destinada a Australia», explicou o xefe da policía de Nova Zelandia, Andrew Coster, que insistiu en que a cantidade atopada «é máis» do que o país utilizaría en tres décadas.
O alixo foi interceptado por un barco da mariña cando a droga se movía á deriva por centos de quilómetros ao noroeste de Nova Zelandia. A alianza Five eyes -a rede de colaboración en intelixencia que compón este país xunto a Australia, Estados Unidos, Canadá e Reino Unido- axudou coas súas informacións sobre a localización a dar coa cocaína dentro dun operativo que, recoñeceu Coster, «asesta un importante golpe financeiro aos produtores suramericanos e aos distribuidores». O xefe da policía, iso si, asumiu que aínda é pronto para determinar a procedencia dos paquetes.
O achado realizado este mércores é o maior de cocaína rexistrado en Nova Zelandia onde, non unha, senón varias veces, atopáronse fardos desta sustancia nas súas praias. No verán do 2019, por exemplo, apareceu case unha vintena de paquetes -por valor duns 2 millóns de euros- en Bethells Beach, ao oeste de Auckland . Entón, os veciños deron a voz de alerta.