Os menores estaban a atacar a un ancián con pedras e paus cando ela interveu
25 may 2019 . Actualizado ás 17:15 h.Bonnie Halcrow, unha muller de 33 anos cunha filla de 10, foi brutalmente atacada por un grupo de menores nun parque da cidade de Saskatoon, no Canadá, aos que chamou a atención por estar a maltratar a un ancián.
O suceso ocorreu o pasado luns, cando a muller, que estaba de visita na cidade, acudiu coa súa filla a un parque para que xogase cunha amiga. A zona de recreo estaba chea de xente, pero a muller puido observar como un grupo de raparigos comezaba a sinalar a un ancián que camiñaba empurrando un carriño a través do parque. Pouco despois, comezaron a insultalo e a tirarlle paus e pedras, o que motivou a intervención de Halcrow.
Segundo ela mesma contou, dirixiuse entón aos nenos para que deixasen tranquilo ao home e comezou a gravalos co móbil e a advertirlles de que avisaría á policía. Os menores sacáronlle entón o teléfono e empezaron a pegarlle ata deixala no chan, onde continuou a agresión.
A muller, cuxa principal preocupación era a seguridade da súa filla, resultou con negróns nas costas, os brazos e as pernas. Halcrow acudiu á policía a denunciar o ataque, que foi gravado por unha testemuña presencial.
O suceso causou preocupación no barrio. Carolyn Rogers, que viu o suceso desde a súa casa, relatou a CBC News que un grupo duns 20 nenos foi responsable de polo menos tres incidentes similares nese parque, sucesos que está investigando a policía.