Róubanlle un diamante de 45 millóns nun hotel de París e substitúeno por un de imitación
INTERNACIONAL
A propietaria tardou dous días en darse conta de que lle cambiaron a pedra preciosa
23 may 2019 . Actualizado ás 12:51 h.Dous homes que se fixeron pasar por expertos en pedras preciosas roubaron o pasado luns un diamante valorado nuns 45 millóns de euros á súa propietaria, que acudira a un hotel de luxo de París para a peritaxe.
A Fiscalía de París indicou a Efe este xoves que abriu unha investigación preliminar por roubo DE banda organizada por eses feitos ocorridos no hotel, que se atopa no distrito VIII a pouca distancia da avenida dos Campos Elíseos.
As pescudas hanse encargado aos policías da Brigada de Represión da Bandidaxe (BRB). A vítima, de nacionalidade guineana, tiña unha cita o luns pola tarde no Warwick, para unha estimación definitiva do seu diamante de 43,5 quilates.
Os dous homes e a muller estiveron a falar no bar e o que se presentou como experto examinou a pedra preciosa antes de devolvela, informa Efe. Con todo, dous días despois a propietaria deuse conta de que lla cambiaron por unha imitación e acudiu á comisaría para denuncialo.
O traballo dos investigadores pasa, en primeiro lugar, por verificar o relato da denunciante para trazar os seus desprazamentos e intentar identificar aos presuntos estafadores.