A Cámara de Representantes esixe a Xustiza o informe Mueller sobre a trama rusa sen censura

O presidente da Comisión de Xustiza da Cámara de Representantes dos Estados Unidos, o demócrata Jerrold Nadler, presentou un requirimento formal para obter sen censura o informe do fiscal especial Robert Mueller sobre a presunta inxerencia rusa nas eleccións de 2016.

O Departamento de Xustiza divulgou o xoves as 448 páxinas do informe elaborado durante dous anos por Mueller sobre a suposta conexión entre o equipo electoral do agora presidente, Donald Trump, e Rusia no 2016, e a posible obstrución á Xustiza por parte do mandatario, pero fíxoo cun milleiro de correccións e sete páxinas completamente censuradas. Ante as queixas dos demócratas por estes cambios, o Partido Republicano expuxo que unhas poucas persoas teñan a opción de examinar unha versión menos censurada.

Nadler confirmou nun comunicado a presentación do requirimento para que o Departamento de Xustiza entregue o informe completo, algo ao que o Goberno debe responder antes do 1 de maio. Así, aínda que o lexislador demócrata está aberto a discutir o acceso ao material, considera que non se pode deixar á marxe da información «á maioría do Congreso».

«As omisións [do informe] parecen significativas», apuntou Nadler, quen advertiu de que mesmo con esta censura hai «graves exemplos» de presuntas irregularidades por parte do presidente, Donald Trump, e dos seus colaboradores. «Corresponde ao Congreso determinar o alcance destas supostas irregularidades e decidir os seguintes pasos», engadiu. No documento, Mueller conclúe que non había «probas suficientes para apoiar cargos criminais» relacionados cos «numerosos contactos entre individuos vinculados ao Goberno ruso» e a campaña de Trump, pero guinda dúbidas sobre unha posible obstrución do mandatario á Xustiza.

Reaccións

 Trump describiu como «puras mentiras» as críticas recollidas no informe Mueller e que poñen en cuestión as súas actuacións, en particular polo seu suposto interese en obstruir as pescudas abertas. Un día despois da difusión do citado documento, o presidente estadounidense puxo en cuestión parte do seu contido. A investigación o desligó da trama rusa, pero apuntou ata dez ocasiones nas que puido incorrer en obstrución.

O mandatario asegurou en Twitter que as declaracións recollidas no «informe do tolo Mueller» son «completamente falsas». «Dado que nunca aceptei testificar, non foi necesario que respondese as declaracións [...], algunhas das cales son puras mentiras e só foron realizadas para que outra persoas quedasen ben ou que eu quedase mal», afirmou. E volveu a describir como unha «fraude» unhas investigacións que «nunca deberían ter tido lugar». Trump, que ao longo destes últimos dous anos denunciou unha «caza de bruxas» contra el, prometeu o xoves que traballaría para que ningún outro presidente tivese que pasar polo mesmo.

Pola súa banda, o Kremlin saíu ao paso das acusacións do Departamento de Xustiza dos Estados Unidos e asegurou que o informe do fiscal  Robert Mueller non ofrece «probas» que acrediten os intentos de Rusia por interferir nas eleccións do 2016. «En xeral, o informe segue sen ofrecer probas argumentadas de que Rusia supostamente interviñese no proceso electoral nos Estados Unidos», declarou este venres o portavoz do Kremlin, Dimitri Peskov, un día despois da difusión do informe, segundo recolle Europa Press. Para Peskov, o texto non fai senón confirmar o que dixo o presidente ruso, Vladimir Putin, que «non existiu» ningunha intromisión de Moscova nos meses previos aos comicios do 2016, segundo informa a axencia de noticias Sputnik.

Non o ve así o Goberno norteamericano, que si deu por confirmada a tese do intento de inxerencia rusa, aínda que descarta que Trump ou alguén do seu equipo conspirasen con Moscova para favorecerse. «Hoxe teño un bo día», asegurou o inquilino da Casa Blanca tras a difusión dunha versión censurada do informe.

---

---

---