Alan García se suicida cando ía ser detido polo caso Odebrecht
INTERNACIONAL
Os últimos catro presidentes de Perú son investigados por recibir subornos
18 abr 2019 . Actualizado ás 07:19 h.Lima, barrio de Miraflores, seis da mañá. Policías do equipo de Investigación de Delitos de Alta Complexidade chaman a unha das casas da exclusiva zona. É a residencia de Alan García, presidente de Perú nos períodos 1985-1990 e 2006-2011. Os axentes, acompañados dun fiscal (xa saltou a polémica sobre se se identificou correctamente) móstranlle unha orde de detención preliminar pola súa suposta implicación no caso Odebrecht. García pide uns minutos a soas para falar co seu avogado. Entra no seu despacho, e pégase un tiro na cabeza. Ás 6.45 ingresou nun hospital próximo, cuberto por unha saba. Os médicos intentaron salvarlle a vida en balde. O expresidente morreu pasadas as dez da mañá de onte, tras ter sufrido tres paros cardíacos.
«Como en ningún documento menciónaseme, e ningún indicio nin evidencia acádame, só queda a especulación ou inventar intermediarios. Xamais me vendín, e está probado», alegara García en Twitter o día anterior ao seu suicidio. Era investigado por presuntos subornos da xigante brasileira da construción, Odebrecht, na licitación e creación da liña 1 do metro de Lima, ademais de por supostas achegas irregulares á súa campaña electoral. As acusacións recaían tamén sobre algúns dos máis estreitos colaboradores do seu segundo Goberno.
Esta fin de semana, o equipo de investigación IDL Reporteiros revelou que o exsecretario da presidencia, Luis Nava, tería cobrado catro millóns de dólares de Odebrecht, unha empresa procesada na maioría dos países de Latinoamérica por haber pago subornos millonarios a políticos e altos funcionarios a cambio da concesión de importantes proxectos de obra pública.
A corrupción da política ao redor da compaña brasileira azoutou especialmente a Perú. Os últimos catro presidentes do país suramericano están a ser investigados por ter recibido subornos.
Alejandro Toledo (2001-2006) atópase prófugo da Xustiza en EE.UU. Os maxistrados peruanos pediron a súa extradición, ata agora sen éxito. É acusado de ter aceptado 20 millóns en subornos. Ollanta Humala (2011-2016) xa pasou por prisión preventiva pola súa suposta vinculación co caso.
O seu sucesor, Pedro Pablo Kuczyinski, dimitiu no 2018, tras ser acusado de haber supostamente aceptado subornos cando era ministro de Toledo. Foi detido a pasada semana e desde o domingo está ingresado nunha clínica, baixo coidados intensivos, debido a un problema de corazón.
As acusacións de corrupción non pesan só contra os expresidentes. A líder da oposición, Keiko Fujimori, tamén é acusada de aceptar diñeiro de Odebrecht para a súa campaña electoral e pasou por prisión. O seu pai, o autócrata que gobernou Perú entre 1990 e 2000, volveu a prisión o ano pasado, tras un breve indulto, para cumprir condena por crimes de lesa humanidade. Todos os presidentes peruanos elixidos nas urnas desde 1985, polo tanto, tiveron graves problemas coa Xustiza.