O Reino Unido ten a capacidade de revogar de forma unilateral o artigo 50 dos tratados europeos, o que iniciou o proceso da súa saída da UE
10 dic 2018 . Actualizado ás 10:13 h.O Tribunal de Xustiza da Unión Europea (TJUE) sentenciou hoxe que o Reino Unido ten a capacidade de revogar de forma unilateral o artigo 50 dos tratados europeos, o que iniciou o proceso da súa saída da UE, o «brexit», ao activarse o 29 de marzo de 2017.
A decisión da corte con sede en Luxemburgo, segundo informa Efe, anunciouse só un día antes da data prevista para a votación do acordo sobre a retirada británica no Parlamento do Reino Unido, onde a primeira ministra, Theresa May, non ten garantidos os apoios necesarios para sacalo adiante.
O TJUE precisou na súa sentenza que a revogación da notificación na que se informaba ao Consello Europeo da decisión de abandonar a UE, levada a cabo de acordo cos requirimentos constitucionais británicos, tería o efecto de que o Reino Unido seguiría na Unión Europea sen cambios no seu status como Estado membro.
Para Luxemburgo, a posibilidade de retirar o artigo 50 existe mentres o acordo de retirada pactado entre Londres e Bruxelas non teña entrado en vigor.
Hai unha semana, o Avogado Xeral do TUE Manuel Campos Sánchez-Bordona xa avalou nun ditame o dereito a cambiar de opinión dun Estado membro que notificou a súa «intención» -non decisión»- de abandonar a UE e reverter así o proceso de desconexión, lembra Europa Press.
O contrario, argumentou o avogado, implicaría na práctica a «saída forzada» da UE dun dos seus Estados membro, que segue sendo parte do bloque para todos os efectos.
A Xustiza europea examinou en apenas dous meses o caso, que responde a unha consulta do máis alto tribunal escocés e que pasou baixo o procedemento acelerado para asegurar unha conclusión antes de que se consome a saída automática de Reino Unido, o 29 de marzo de 2019.
