Rusia non descarta accións militares despois de que Trump abandone o acordo nuclear
INTERNACIONAL
O Goberno de Putin considera o anuncio «unha chantaxe»
21 oct 2018 . Actualizado ás 18:24 h.O Goberno ruso non descarta «medida militares» despois de que o presidente estadounidense, Donald Trump, anunciase a súa decisión de abandonar o acordo estratéxico sobre armas nucleares de curto e medio alcance e tras acusar a Moscova de violar as condicións do tratado. Consideran que a retirada nunha «chantaxe», en palabras do viceministro de Exteriores ruso, Sergei Riabkov, que ademais se anuncia nos días previos á visita que a semana que vén realizará o novo asesor de seguridade de Trump -e un dos elementos máis radicais do seu gabinete-, John Bolton, segundo informa Europa Press.
«A diferenza dos nosos colegas estadounidenses, entendemos a gravidade do problema e a súa importancia para a seguridade e a estabilidade estratéxica», declarou Riabkov. «Se os estadounidenses continúan actuando de xeito cru e directo, retirándose unilateralmente de todo tipo de acordos, como o de Irán, como este... verémonos obrigados a tomar medidas en resposta, mesmo de carácter militar, aínda que non queiramos ir tan lonxe», avisou en comentarios recolleitos pola axencia RIA Novosti. Riabkov engadiu que Estados Unidos «non tiña motivos para acusar a Rusia de supostamente violar o tratado».
Para o senador ruso e ex presidente do Comité de Asuntos Exteriores da Duma Estatal Alexei Pushkov, a declaración de Trump «devolve o mundo á a guerra fría». «Tal saída sería o segundo golpe máis poderoso infligido a todo o sistema de estabilidade estratéxica do mundo», dixo. «O primeiro golpe foi a retirada dos Estados Unidos do tratado de mísiles antibalísticos en 2001. Unha vez máis, o iniciador da retirada do tratado é os Estados Unidos», lamentou.
