O avogado de Wojciech Janowski admite no xuízo que o seu cliente ordenou o asasinato da súa sogra, a millonaria monegasca
17 oct 2018 . Actualizado ás 11:08 h.Wojciech Janowski, antigo cónsul honorario polaco en Mónaco, ordenou o asasinato da súa sogra, a millonaria monegasca Hélène Pastor, segundo admitiu o seu avogado nun inesperado golpe de efecto despois de que o home de negocios negase durante anos calquera implicación.
«Wojciech Janowski é culpable de ter ordenado o asasinato de Hélène Pastor. Esas palabras que agardaban del saen da miña boca», dixo o famoso avogado penalista Eric Dupond Moretti ante a corte de Aix-en-Provence (ao sueste de Francia), onde se desenvolve o xuízo desde mediados de setembro.
Fronte ao seu cliente, que rompeu en pranto, Dupond Moretti asegurou en cambio que o seu Janowski non ordenou a morte do chofer da millonaria, Mohamed Darwich, que faleceu tiroteado xunto a Pastor.
Hélène Pastor caeu nunha emboscada no 2014 á saída dun hospital de Niza (sueste de Francia), onde visitaba ao seu fillo, Gildo Pallanca-Pastor, vítima dun grave accidente vascular cerebral. Un home armado cun fusil disparou e feriu gravemente á millonaria, de 77 anos, e ao seu chofer exipcio, de 54. Este último morreu días despois, mentres que Pastor, herdeira dun imperio inmobiliario cuxa fortuna está valorada en 12.000 millóns de euros, faleceu unhas semanas despois.
Rapidamente, o seu xenro, Wojciech Janowski, apareceu como un dos principais sospeitosos. Dupond-Moretti explicou ante a corte que o seu cliente ordenou o asasinato da súa sogra para protexer á súa parella, Sylvia Ratkowski, a filla de Hélène Pastor, a quen segundo el a súa nai maltrataba psicologicamente.
Foi xustamente ese o móbil que dera Janowski, que nun primeiro momento había confesado o crime ante a policía, antes de retractarse alegando que non entendera ben o que lle preguntaron. A acusación, que pediu cadea perpetua, apuntaba a que o móbil do asasinato era financeiro e que Janowski ordenou o asasinato da súa sogra para obter a parte da herdanza destinada a Sylvia Ratkowski.
Contra o adestrador deportivo de Janowski, Pascal Dauriac, a quen o exconsul encargou a tarefa de organizar o crime, a fiscalía pediu unha pena de 30 anos de cárcere. Dauriac é un dos único entre os 10 acusados en ter recoñecido desde o principio a súa implicación na planificación do dobre asasinato.
Hélène Pastor era unha das herdeiras dun imperio inmobiliario monegasco fundado polo seu avó italiano Jean-Baptiste, procedente dunha familia pobre de Luguria (Italia), e desenvolvido logo polo seu pai, Gildo.