O Status de Protección Temporal, coñecido como TPS, outorgouse tras o devastador terremoto que azoutou a illa no 2010
21 novs 2017 . Actualizado ás 07:23 h.A administración do presidente estadounidense, Donald Trump, anunciou hoxe que non renovará a protección migratoria especial coñecida como TPS da que se benefician miles de haitianos desde o devastador terremoto que azoutou a illa no 2010.
A decisión foi anunciada este luns pola noite polo Departamento de Seguridade Nacional (DHS), que lles dá ata o 22 de xullo do 2019 para regularizar os seus permisos de traballo e residencia ou abandonar o país. Se non o fan, exponse a ser deportados.
Os haitianos que teñen agora mesmo esta protección son uns 46.000, aínda que chegou a haber preto de 60.000 con ela. O 22 de xullo de 2019 caducarán os seus permisos de traballo e residencia. Esa data supón unha prolongación por 18 meses do seu TPS.
O Status de Protección Temporal, coñecido como TPS polas súas siglas en inglés, outórgase a cidadáns de países con condicións extraordinarias, como conflitos armados ou naturais, designados nunha lista do DSH. Eses permisos hanse ir renovando no caso de Haití desde que foi incluído na lista tras o terremoto de 2010.
O pasado maio, John Kelly, entón secretario de Seguridade Nacional e agora xefe de gabinete de Trump, anunciou que se outorgaba a última prórroga a Haití. Pero esta foi agora prolongada por 18 meses para que teñan tempo para adaptarse.
A principios deste mes, a administración anunciou que non renovará o TPS dos nicaragüenes, que son uns 2.550, e prolongou por seis meses, ata o 5 de xullo de 2018, o dos hondureños (57.000), mentres decide que fai definitivamente. Tamén debe tomar en breve unha decisión sobre os 195.000 salvadoreños acollidos a el. «A decisión de pór fin ao TPS para Haití tomouse tras unha revisión das condicións baixo as que a designación do país foi incorporada orixinalmente e e sobre se esas condicións extraordinarias pero temporais impedían a Haití manexar adecuadamente o retono dos seus nacionais», indicou do Departamento que dirixe interinamente Elaine Duke.
«Baseándose en toda a información dispoñible, incluídas as recomendacións recibidas como parte dun proceso de consultas interagencial, a secretaria interina Duke determinou que esas condicións extraordinarias pero temporais causadas polo terremoto xa non existen», engadiu un comunicado de DHS.
O Goberno de Trump fixo da man dura coa inmigración unha dos seus acenos de identidade. Xunto aos TPS que está a cancelar, o mandatario anunciou en setembro a cancelación de DACA, o programa co que Barack Obama protexeu da deportación a preto de 800.000 mozos indocumentados levados polos seus pais a Estados Unidos cando eran nenos.
Os seus permisos comezarán a caducar en marzo e se para entón o Congreso non aprobou unha solución lexislativa para eles, como Trump encomendoulle, poderán empezar a ser deportados a países cos que na maioría dos casos non comparten xa ningún lazo.