Importantes dirixentes do Partido Republicano critican ao presidente polas súas últimas declaracións que foron encomiadas polo histórico dirixente do Ku Klux Klan David Duke
16 ago 2017 . Actualizado ás 08:11 h.Trump culpou este martes a «os dous bandos» da violencia desatada o sábado en Charlottesville e puxo especial énfase na responsabilidade da esquerda por ter atacado, dixo, aos neonazis. «Que pasa coa alt-left (esquerda alternativa) que atacou ao que vostede chama alt-right (dereita alternativa, racista)? Teñen algunha culpa?», dixo o presidente durante unha rolda de prensa en Nova York.
As palabras de Trump foron ben recibidas pola ultradereita estadounidense e o histórico dirixente do Ku Klux Klan David Duke encomiou ao presidente por «dicir a verdade» sobre o sucedido en Charlottesville e condenar aos «terroristas de esquerda».
Pero importantes dirixentes do Partido Republicano criticaron ao presidente por culpar a «os dous bandos». O presidente do Congreso e terceira autoridade do país, Paul Ryan, criticou a «ambigüidade moral» neste conflito. «Debemos ser claros. O supremacismo branco é repulsivo. Este fanatismo é contrario a todo o que este país representa. Non pode haber ambigüidade moral», dixo Ryan na súa conta de Twitter.
Polo seu lado, o veterano senador John McCain rexeitou pór no mesmo saco a neonazis e antifascistas, tal e como fixo Trump. «Non hai equivalencia moral entre racistas e estadounidenses en pé para desafiar o odio e a intolerancia. O presidente dos Estados Unidos debería dicilo», dixo McCain tamén en Twitter.
O gobernador de Ohio e exrival de Trump nas primarias, John Kasich, dixo como McCain que non hai equivalencia posible entre os dous grupos: «Non hai equivalente moral aos simpatizantes nazis. Non pode haber lugar en EEUU, nin no Partido Republicano, para o racismo, antisemitismo, odio ou nacionalismo branco. Punto».
O sábado en Charlottesville un neonazi matou a unha muller que participaba nunha manifestación antirracista en rexeitamento ao racismo de branco.