«O comunicado é un erro pero respéctoo», reaccionou o paparazzi
17 feb 2018 . Actualizado ás 14:38 h.A súa vida leva ocupando titulares e minutos de televisión desde fai un par de meses e ata o momento habíase mantido calada. Pero cansada da exposición mediática á que se está sometendo á súa familia, Toñi, a exparella de Gustavo González, rompeu o seu silencio.
Nos últimos días especulouse en Sálvame , o programa no que Gustavo traballa, que Toñi tiña a intención de conceder unha entrevista para falar da relación extramatrimonial da súa exparella, e converterse na cuarta peza do puzzle deste culebrón televisado protagonizado polo reporteiro, o seu antes amante- agora noiva María Lapiedra e o exmarido desta, Mark Hamilton. Gustavo González manifestara sentirse presionado pola avogada de Toñi, segundo explicou o venres pola tarde Belén Esteban no programa. «Gustavo dixo que a avogada lle presionaba dicindo que Toñi ía falar nas revistas cando isto é mentira».
E, por iso, a letrada decidiu remitir ao programa un comunicado en nome da súa defendida, para en primeiro lugar negar que estea entre as súas intencións o conceder unha entrevista, pero tamén para destacar que Gustavo e Toñi están inmersos nun proceso de divorcio que afecta «a toda a familia» e que se atopa nunha fase «delicada».
«Tanto ela como a súa familia, consecuencia das continuas aparicións televisivas de D. Gustavo González facendo pública a súa relación extramatrimonial e dando abundantes detalles sobre a mesma están sometidos a unha gran exposición mediática que poden causar danos dificilmente reparables». Por iso, conclúe o seu comunicado solicitando que se poñan fin a «especulacións», porque o seu único desexo é preservar a intimidade da súa familia.
«O comunicado é un erro pero respéctoo», asegurou o paparazzi nunhas declaracións ao programa Socialité, aínda que tamén recoñeceu que «houbo declaracións e postas en escena que foron evitables» ao longo dos últimos meses, pero que intentou en todo momento preservar a intimidade da súa familia e non falar dela.
Máis información
