Afirmaba Iago Aspas hai poucos días que Claudio Giráldez é un enfermo da táctica. Pero que é isto da táctica? Onde comeza e onde remata? É cousa do adestrador ou tamén dos xogadores? O bo adestrador é aquel que, por riba de saber de sistemas de xogo (4-4-2, 4-2-3-1, e un longo etc), sabe dos seus protagonistas. Parafraseando a Juanma Lillo, «a fonte principal para coñecer o xogo é coñecer ao xogador. Porque saber de fútbol é saber de futbolistas». O bo adestrador non é aquel que coñece sistemas de xogo, senón que é aquel que, coas pezas das que dispón, sabe encontrar a organización idónea para explotar as fortalezas dos seus xogadores. En definitiva, os xogadores van antes que o sistema.
Asumindo este principio, cando falamos de táctica, a mirada ten que ir dirixida aos xogadores. Son eles os encargados de producir a táctica, de expresala por medio do xogo. A táctica nace dos problemas que plantean os rivais, e das solucións que atope o xogador a estes problemas. É dicir, identificar in situ as mellores solucións posibles. Cada situación ou evento que se produce durante o xogo é único e irrepetible. Non existen dúas situacións iguais. O entrenador pode plantexar como defender a partir da análise do rival, pero as decisións de como facelo dependen dos xogadores, xa que é a interacción co rival a que provoca as accións tácticas. Isto é, o adestrador propón o plan de xogo, pero o xogador toma as decisións en tempo real nun contexto cambiante.
O papel de Giráldez non é mandar o que o xogador debe facer, senón deseñar o marco xeral que permita aoss xogadores tomar as mellores decisións posibles durante o partido. Tendo todo isto en conta, Girález cumpre dúas máximas que vimos de expresar: coñece aos xogadores por riba dos sistemas, xa que 16 xogadores da plantilla actual pasaron polo filial. Por outro lado, ten un profundo coñecemento do plan do xogo idóneo para estes xogadores. Dende que substituíu a Rafa Benítez en marzo do 2024, o equipo encadea non só bos resultados, senón un estilo de xogo recoñecible e adaptado ao perfil de plantilla, onde a identidade colectiva se constrúe a partir do talento individual dos xogadores e non a través do sistema de xogo. En definitiva, Giráldez proporciona neste Celta as regras do xogo, pero os futbolistas deciden dentro destas regras.
Rubén Maneiro é profesor Titular de Metodoloxía do Adestramento Deportivo da Universidade de Vigo.