O mediocentro do Celta confirma a súa boa evolución, xa toca balón e agarda estar dispoñible «pronto»
22 oct 2021 . Actualizado ás 19:30 h.Renato Tapia dá pasos cara á recuperación e o peruano, que onte fixo traballo en solitario na sesión de Balaídos, xa se sente mellor da rotura fibrilar de grao I no bíceps femoral da perna dereita padecido na concentración da selección de Perú.
«Estou a mellorar despois dunha semana don dobres quendas de preparación. A verdade é que moi ben. Fisicamente estou ben, non sinto dor e iso é o bo», comentou o centrocampista aos medios do club.
Unha das novidades é que xa comeza a tocar o balón e faino ademais con boas sensacións. «Levo un par de adestramentos co fisio, e cos que están en recuperación tocando un pouco un pouco balón, xa sinto un pouco mellor o pé», indicou. Tapia considera que «veño traballando ben, evolucionando rápido e agardemos que pronto poida volver».
O equipo
Desde fóra, apunta que cada día ve mellor ao equipo máis aló dos números. «Cada día véxoo mellor con independencia dos resultados, creo que se veu traballando ben e nótase no día a día».
Avisa, por outra banda, da dificultade que terá o Celta no Coliseo Alfonso Pérez o vindeiro luns. «Sempre Xetafe é unha praza moi difícil, e máis polo que eles se están xogando. Vai ser un partido loitado, pero se facemos as cousas ben podemos levarnos puntos».