A rotura fibrilar de xemelgo resultou latosa, pero o lateral podería estar en dez días
02 dic 2020 . Actualizado ás 05:00 h.Kevin Vázquez e Sergio Álvarez son os xogadores que máis tempo levan no parte médico. O porteiro, desde maio pasado, e o lateral, desde o 30 de setembro. O de Nigrán está na recta final da súa recuperación dunha rotura fibrilar no xemelgo interno da perna esquerda e a previsión é que poida estar nunha marxe de dez días. A súa presenza, ademais, pode ser importante na recta final do ano tendo en conta que Lucas Olaza ten catro amarelas e Hugo Mallo, que arrastra tres cartolinas, podería ter que cambiar de banda, xa que David Juncà, a substitución natural, tamén está lesionado. Para o porteiro, que está parado desde o 18 de maio pola rotura dos meniscos do xeonllo dereito, non hai data polo momento.
Kevin Vázquez é un dos contados xogadores do primeiro equipo que quedan por debutar esta tempada (Sergio, Juncà, Sáenz e David Costas tampouco o fixeron). Óscar García apostou por Hugo Mallo no inicio de tempada e cando o capitán caeu lesionado, a opción do lateral dereito pasou por Sergio Carreira, xa que para entón Kevin xa estaba fóra de combate.
O de Nigrán produciuse a lesión no xemelgo interno, unha zona complicada para as recuperacións, o que invitou a apostar pola prudencia como táctica. Cun prognóstico inicial de entre catro e seis semanas, o lateral xa acadou as oito, pero en ningún momento tratouse de adiantar os prazos. Ademais, durante a recuperación xurdiron pequenas complicacións que xa están superadas pero que retardaron o proceso. En total, onte cumpríronse dous meses da súa lesión, tempo no que ser perdeu seis partidos.
Esta semana, Kevin Vázquez continúa traballando á marxe, pero xa está na recta final do seu proceso e en cuestión de días xa podería incorporarse co grupo. Se todo vai ben, non pode descartarse que estea dispoñible para a contenda ante o Cádiz prevista para o luns 14 de decembro.
A súa volta pode coincidir cunha fase condensada do calendario, porque descartando que estea apto para o partido de San Mamés, a continuación o Celta afrontará catro compromisos na marxe de dez días (Cádiz, Llanera en Copa do Rey , Alavés e Xetafe). Unha boa oportunidade para que Kevin Vázquez poida estrearse.
O lateral vive a súa terceira tempada no primeiro equipo. Na primeira tivo que agardar ata a xornada 13 para debutar na liga, competición na que disputou catro partidos aquel ano, pero o curso pasado o nigranés discutiulle a praza a Hugo Mallo e rematou xogando 17 partidos, todos menos un como titular, e foi un asiduo nas formacións da recta final do campionato.
Este curso, despois de que o Celta non exercese a opción de corte, quería dar outro paso adiante, pero a lesión durante un adestramento lle chafó os plans. Agora deberá comezar de cero, pero coa opción de poder disputar algún partido de liga antes de finalizar o ano ou, polo menos, poder recuperar sensacións na Copa do Rey ante o Llanera asturiano, partido que podería xogarse no Carlos Tartiere ovetense e cuxo horario se confirmou onte (o xoves 17 de decembro ás 21 horas).
O resto de lesionados
Para esa cita antóllase difícil que poida chegar Sergio Álvarez, que nesta ocasión decidiu non apurar os prazos e ademais viu retardada a recuperación por un positivo en covid-19. Si podería estar Emre Mor, que xa leva case un mes no parte médico por unha pubalxia. Está por ver cal é o alcance en tempo da luxación recidivante no ombro dereito de Juncà, o último en caer. O lateral catalán acumula 13 meses sen disputar un partido oficial, desde o 9 de novembro de 2019 no Camp Nou. O verán pasado non quixo saír e tampouco está nada claro o que vaia a suceder co seu futuro no mercado invernal.
