O canteirán estreouse co Celta B na primeira vitoria da tempada, ante o Zamora
23 novs 2020 . Actualizado ás 11:21 h.Despois de vivir desde o banco os catro primeiros partidos da tempada, onte chegou a primeira oportunidade en Segunda B para o canteirán Carlos Domínguez Cáceres, de 19 anos e que este verán deu o salto ao filial unha vez rematada a etapa xuvenil. Era o capitán do equipo de División de Honra que se clasificou por primeira vez na súa historia para a Youth League.
Mentres o outro xogador que deu o salto e que aínda non tiña experiencia co filial, Raúl Blanco Juncal, estreouse na primeira xornada, Carlos tivo que agardar á quinta. Foi, ademais, a lesión dun compañeiro (Alberto Solís) a que levou a Onésimo Sánchez a darlle a oportunidade de vivir os seus primeiros minutos. E fíxoo do mellor xeito: celebrando no colectivo o primeiro triunfo do equipo este curso e deixando moi boas sensacións no individual.
«Feliz polo debut en 2B e pola vitoria do equipo», escribiu o futbolista na súa conta de Twitter. Recibiu multitude de eloxios que incluíron o do antigo director da canteira e actual membro do corpo técnico do primeiro equipo, Carlos Hugo García Bayón, que comentou que o defensa fixera un «pedazo de partido».
Tamén foi un día especial para outro canteirán, Iago Domínguez, que ao non poder xogar por motivos persoais Patrick Sequeira, púxose baixo paus no día do seu 19 aniversario e puido celebralo con portería a cero e triunfo.
