Todo o que rodea a Pione Sisto é moi misterioso, pero a impresión que dá é que parece que hai un problema de comunicación. Se o presidente di que ten un problema importante e un motivo para a súa actitude, tampouco se entende unha multa tan importante como a que se lle puxo. Parece que el non soubo transmitir ao club o que lle pasaba, non foi capaz e iso derivou nunha nova situación de indisciplina que se podería arranxar se a súa ausencia fose xustificada, como no caso de Smolov. Pero é certo que non é a primeira vez que suceden cousas estrañas con el, que tivo actitudes impropias dun profesional.
Desde a chegada de Óscar, contou e tivo minutos. É un futbolista que pode achegar, pero para iso necesita estar centrado e motivado. A volta á competición vai ser estraña e con cantos máis xogadores poida contar o técnico, mellor, pero tampouco o vexo como un xogador fundamental no cambio que dera o equipo co actual adestrador, senón como un futbolista para sumar. Non creo que vaia a ser crucial para as últimas xornadas, pero poder dispor de todos sería unha boa noticia cando non se sabe como van responder a nivel físico. A directiva terá que pór nunha balanza o que achega e estas situacións de indisciplina que se repiten e que non é a primeira vez que o club ten que atallar.
Tamén é certo que pasou por outras situacións esta e recuperouse. Pero non sabemos que lle pasou nesta ocasión e de que xeito pódenlle afectar os problemas que Mouriño di que tivo.
Julio A. Buylla é adestrador nacional, máster en psicoloxía deportiva e coach deportivo.
