O presidente do club canario revela que o Celta intenta recolocar ao eslovaco
28 ene 2020 . Actualizado ás 12:33 h.A o Celta ocórrelle con Mazan algo similar ao caso Pape pero ao revés. Neste caso é o Tenerife, o club ao que foi cedido ata final de tempada e en cuxos plans non entra. En palabras do seu propio presidente, Miguel Concepción: «A Mazan dixémoslle que non contamos con el e o Celta está a intentar recolocalo», comentou en Cope Tenerife. Para o eslovaco era a segunda cesión despois doutra mala experiencia en Venecia.
Mazan chegou ao Celta hai agora dous anos, no mercado de inverno do 2018, pero nunca conseguiu facerse un oco no equipo. Nesa primeira tempada no club, con Unzué, só participou en dous encontros, en ambos saíndo desde o banco, e sumou 82 minutos.
Na súa segunda tempada completou dous partidos, un en Copa fronte á Real e outro en Liga contra o Barcelona no Camp Nou, ambos con Cardoso. Xusto despois, hai agora un ano, foise cedido por primeira vez, ao Venezia, onde tampouco tivo o protagonismo agardado. De feito, había unha opción de compra que o conxunto italiano non exerceu.
Ao non entrar nos plans de Escribá, o pasado verán volveu saír con destino ao Tenerife de López Garai, con quen si foi importante ao comezo de tempada. Pero o cambio no banco prexudicou ao eslovaco, que non xoga desde decembro e ultimamente non entrou nin sequera nas convocatorias.
