O equipo de Jacobo Montes sufriu a pasada xornada unha dolorosa derrota que lle condenou ao descenso
07 dic 2019 . Actualizado ás 09:56 h.O Celta B recibe este domingo (12.00 horas) ao Oviedo B nun duelo de filiais ao que os de Jacobo Montes chegan coa necesidade de pasar páxina tras un partido a pasada xornada no que o técnico considerou que fixeran o ridículo", segundo as súas propias palabras. Caeron por un incontestable 6-1 nun duelo fronte ao Atlético Baleares no que se puxeron por diante nada máis empezar co primeiro gol de Gabri Veiga na categoría.
O porriñés, que está concentrado coa selección española sub-18 é baixa precisamente para esta xornada xunto co lesionado de longa duración Álvaro Fernández Calvo. Pola contra, Montes recupera a Manolito Apeh e Yaw Yeboah, ambos con problemas físicos a semana pasada. O ganés, ademais, perdeuse os catro partidos anteriores por estar coa súa selección na Copa África sub-23.
Este resultado adverso, xunto cos positivos de varios rivais na loita pola salvación, condenou aos vigueses aos postos de descenso dos que tratarán de saír buscando a segunda vitoria consecutiva en Barreiro. O segundo equipo do Oviedo, pola súa banda, é noveno con cinco puntos máis que os celestes (21) e veñen de gañar a semana pasada para marcar distancias cos postos de perigo.