O próximo rival é o único ante o que o Celta sumou seis puntos o curso pasado e o último ao que gañou fóra
20 novs 2019 . Actualizado ás 05:00 h.Se houbo un rival determinante na salvación do Celta a tempada pasada foi o Vilarreal, equipo co que os vigueses retomarán a competición a domicilio na xornada 14 tras o actual parón de seleccións este domingo. Ante o conxunto castellonenco, os celestes lograron dous dos seus dez triunfos do curso 2018/2019 e, ademais, a ningún outro lograron gañarlle tanto na ida como na volta. A isto hai que sumar que con eles en fronte comezou en Balaídos A Nosa Reconquistas, coas inesquecibles imaxes de Iago Aspas chorando no banco tras reaparecer con dobrete.
Antes diso, na primeira volta do pasado campionato, o equipo tamén levou os tres puntos do estadio da Cerámica. Viñan de gañar ao Huesca e sería a segunda e última vez que encadearían dous encontros gañados en toda a tempada. Foi o segundo dos tres triunfos en catorce partidos que conseguiu Miguel Cardoso no banco do Celta . A aquel compromiso chegaban aínda fóra dos postos de descenso -cun colchón de seis- e, aínda que logo regresarían, aqueles puntos foron tamén claves para a permanencia.
Desde aquel partido do que pronto se cumprirá un ano -foi o 8 de decembro do 2018-, o Celta non volveu a sumar de tres a domicilio. No que vai de curso o equipo obtivo lonxe de Balaídos dous puntos froito doutros tantos empates (ante Sevilla e Atlético de Madrid) de 18 posibles. Tanto o ano pasado como este, os pobres rexistros fóra de casa conduciron ao equipo a unha situación crítica na táboa e a verse inmerso na loita por eludir o descenso.
E se o Celta segue estando en problemas, a situación do Vilarreal é moi distinta agora. A última vez que recibiron aos célticos estaban inmersos no seu mesma pelexa e, de feito, sumaban tres puntos menos, aínda que tiñan unha marxe de tres co descenso e marchaban decimoséptimos. A diferenza co seu rival da próxima xornada, o equipo amarelo aprendeu a lección e está na zona tranquila da táboa, con 18 puntos -o dobre que o Celta -.
O inicio da Nosa Reconquistas
O último enfrontamento entre Celta e Vilarreal tivo lugar en Balaídos e os locais, con Aspas como auténtico salvador, foron capaces de dar a volta a un 0-2 adverso para levar os puntos e, ao cabo, continuar na categoría. Corría a xornada 29 e o Celta chegaba en descenso, a catro puntos dun Vilarreal que marcaba o corte.
Iago Aspas, que reaparecía nese partido e que co tempo confesou que Escribá non lle vía preparado para ser titular esa noite, emerxeu para resucitar a un Celta que coa derrota momentánea do 0-2 ao descanso tiña practicamente pé e medio en Segunda. Recortou distancias cun gol no 50 e, despois de que Maxi Gómez lograse o empate no 70, de novo o moañés viu portería para dar a volta ao marcador e pór o 3-2 definitivo.
Máis precedentes
Desde a volta a Primeira, o Celta cultivou nas súas visitas ao Vilarreal tres vitorias e tres derrotas, sen que ningún dos enfrontamentos saldouse con igualada. Ademais da tempada pasada, en que gañaron 2-3 (Brais Méndez, Okay Yokuslu e Maxi Gómez), tamén se impuxeron neste campo na tempada 2015/2016 (1-2, Nolito e Orellana) e na 2012/2013 (0-2 e mesmos goleadores).
No histórico de visitas do Celta ao Vilarreal en Primeira figuran catro vitorias visitantes, sete triunfos locais e dous empates. Ademais de Aspas e Brais, tamén Pione Sisto sabe o que é bater a este rival, xa que o fixo na derrota por 4-1 do 24 de abril do 2018. Tras ser titular no Camp Nou, está por ver se Óscar García Junyent mantén a aposta por el no seu segundo partido no banco.
