Foi nunha partida fronte ao Vilarreal no que tamén marcou Iago Aspas
16 oct 2020 . Actualizado ás 22:51 h.2010: O actual capitán do Celta , Hugo Mallo, conseguía fai hoxe dez anos -co equipo en Segunda- o seu primeiro gol co equipo. Foi a domicilio fronte ao filial do Vilarreal nun encontro que rematou con empate a dous goles no marcador. O vigués Iago Falqué abriu o marcador e Iago Aspas -que fora suplente ese día- puxo as táboas pouco despois; a continuación marcaba o lateral de Marín e o conxunto local empataba nos últimos instantes cortando un refacho celeste de sete triunfos seguidos.
Paco Herrera aliñara aquel 16 de outubro do 2010 a Falcón, o propio Hugo, Jonathan Vila, Catalá, Roberto Lago, Bustos, López Garai, Joan Tomás, David Rodríguez, Álex López e Papadopoulos. En fronte, nun equipo adestrado por Javi Gracia , estaban o que posteriormente se convertería en futbolista céltico Natxo Insa, que fora da partida.
O seguinte gol de Hugo faríase agardar ata maio do 2015, no 3-2 ao Espanyol da última xornada dese curso en Balaídos no que dedicou o tanto a Oubiña, que acababa de anunciar a súa retirada e despediuse nese partido. Ao ano seguinte anotou en Mestalla (vitoria celeste por 0-2) e xa na tempada 2016/2017 logrou ata tres goles: ante Sporting e Deportivo en Liga e ante o Krasnodar en Europa League.
No curso 2017/2018 quedou sen ver portería, o mesmo que a pasada, mentres que hai dúas tempadas conseguiu un único tanto, fronte ao Real Madrid en Balaídos nun partido disputado o 11 de novembro do 2018 nun partido que rematou con resultado de 2-4 para o conxunto que nese momento dirixía Solari.