Jaime Rey , abonado de Río Baixo en Balaídos, conta como ao non poder acceder á súa butaca tivo que ver o partido na zona para persoas con diversidade funcional
20 ago 2019 . Actualizado ás 19:41 h.Na hora anterior ao comezo do partido do pasado sábado entre Celta e Real Madrid, afeccionados que levan anos abonados aos mesmos asentos de Río Baixo en Balaídos descubrían un panorama distinto. Era momento de probar as novas butacas en todos os casos e, nalgúns, mesmo de buscar a nova localización dos seus asentos, se é que existían (hai abonados que aseguran ter carnés que non se corresponden con ningunha das prazas numeradas da bancada).
Moito se falou durante o verán dos novos asentos, polémica incluída entre o Concello e o club pola distancia dos mesmos e todos os detalles relativos á reforma que tivo lugar nesa zona do campo durante a pausa estival da competición. Algúns afeccionados, da man do club a través da Federación de Penas, puideran xa facerse unha idea da nova realidade, mintas que días máis tarde os peñistas tiveron oportunidade de velas convocados polo Concello e escoitando de paso as súas explicacións. Pero foi o sábado cando o groso dos afectados puideron descubrir como lles afectaba en cada caso.
Un deses abonados foi Jaime Rey , socio de Río Baixo «desde hai moitos anos», comenta, e cuxo 1,94 de estatura tradúcese na imposibilidade total para facer uso do seu asento. «Coa miña estatura, o sábado comprobei que é fisicamente imposible que me sente no meu asento», expón.
A súa localidade é a 98 da fila 19, que como ocorreu en moitos outros casos, cambiou de emprazamento dentro da bancada. «Ata agora era case pegado ao corredor, quedando un asento entre o meu e o corredor. Agora atópome con que está no medio dun grupo de asentos, co que resulta moito máis incómodo acceder ata el», explica.
Ante este escenario, a única solución que atopou foi desprazarse ata a parte de arriba da bancada, en concreto á zona para persoas con diversidade funcional, e sentarse na plataforma destinada a estes afeccionados. «Estaba baleira e non molestamos a ninguén, pero é indignante o cambio. Cos antigos cabía, non comodamente, pero si para poder aguantar un partido á perfección», compara.
Insiste en que nas circunstancias actuais para el é «fisicamente imposible que caiba» e facer uso dun asento polo que, lembra, pagou 434,5 euros e porque ten dereito ao desconto de accionista. Tras contactar co servizo de atención ao afeccionado do club, a plataforma Escoitamos, a Rey ofrecéronlle a mesma solución que logo se fixo extensiva a todos os abonados de Río Baixo de cambiar de bancada, unha posibilidade que se vai pensar, pero que non lle deixa satisfeito. «Reformulareimo, pero en principio quedarei na bancada e buscarei sitio na zona de arriba como neste partido», afirma. A outra posibilidade é «cruzar a tribuna pagando a diferenza de prezo e moito máis esquinado» que o asento que desde hai anos viña sendo o seu en Río Baixo.
«Non entran as pernas»
Carla Blanco conta como o seu afillado, de 1,86 de estatura, viuse tamén afectado pola nova distancia entre os asentos (ademais de que tampouco as súas butacas están no mesmo sitio que antes). «Non pode sentarse. Viu o partido de pé na parte alta da bancada porque non lle entraban as pernas e, o ano pasado, aínda que incómodo pola súa altura, cabía perfectamente», expón. Foi testemuña tamén de como outros afeccionados tiñan problemas. «A persoas do noso ao redor que non teñen moita mobilidade resultoulles incómodo estar os 90 minutos sentados xa que tiñan que abrir as pernas para non darse co asento de diante», indica.
Esta afeccionada comenta que «o espazo é menor que antes e aínda que o asento resulta máis cómodo debido a que ten un respaldo máis alto, o espazo para as pernas é moi pequeno». Móstrase comprensiva cos cambios, pero lamenta a «desinformación e falta de responsabilidade» que considera que houbo. «Debían avisar e dar posibilidades de cambio de forma preferente, xa que nós seguimos pagando polo mesmo sitio de hai anos e se iso cambia deberían informar. Pecan de non coidar aos socios e non se dan conta que non hai directiva nin xogadores que fagan Celta sen afección».
