O pequeno saíu correndo desde a bancada cara a Iago e o moañés fíxolle partícipe da celebración do equipo
08 may 2019 . Actualizado ás 14:18 h.A celebración conxunta entre xogadores e afección converteuse en todo un ritual nos últimos partidos de casa. Cos futbolistas sobre o céspede e, en xeral, a maioría dos afeccionados na bancada. Pero nos vídeos dos festexos do partido de Barcelona chamaba a atención que Aspas estaba acompañado por un neno que non era ningún dos seus fillos, tampouco ningún outro familiar nin fillo de amigos ou coñecidos do moañés. Daniel Romay Iglesias , de sete anos, é un pequeno alleo á estrela do Celta , pero ao que este fixo completamente feliz o sábado.
«Non o coñecemos de nada. O meu fillo e eu somos socios da bancada de animación e o outro día, coa emoción do partido e da situación actual, saltamos un pouquiño ao campo e el foise correndo cara a Iago», relata Agustín, o pai da criatura. Móstrase completamente agradecido da actitude que tivo Iago co pequeno. «Foi incrible como trato a Daniel en todo momento, un máquina», engade.
A Agustín fáltanlle as palabras para explicar o que supuxo este xesto para o seu pequeno. «Estivo flipado, ao principio só se ría e dicía que estivera con Aspas no céspede do estadio, non llo cría. Hai algún vídeo por aí que se lle ve completamente alucinado», conta con entusiasmo. De volta no coche, escoitoulle chorar e preguntoulle se se fixo dano. «Díxome que era a emoción, que aínda non llo cría e eu tampouco. Velo así, con esa emoción, é a primeira vez, que o vexo así, e moito menos chorando», explica. Aínda que lembra que tras o partido contra o Vilarreal Daniel xa lle dixo que non lle faltou moito para que caesen as bágoas.
Dani xoga ao fútbol sala no Cíos Vigo e é celtista como o seu pai. O pequeno encárgase de que pai e fillo non falten a ningún partido. «Algunha vez que a min non me apetecía moito ir, agarroume por unha orella e a Balaídos», sinala divertido. Así que, «con choiva ou sol», non faltan ao municipal vigués. E iso que Daniel xamais imaxinou que nunha desas visitas vai atopar a recompensa de sentirse como un xogador do persoal máis e ao lado do seu ídolo.
Onte Agustín agradecía a Iago o xesto con esta mensaxe:
