O adestrador do Celta alegou que non ten a contestación a esa pregunta
16 feb 2019 . Actualizado ás 22:43 h.O adestrador do Celta , Miguel Cardoso, eludiu falar do seu futuro á fronte do equipo tras a derrota do seu equipo ante o Levante (1-4), a cal achacou aos «erros» dos seus futbolistas durante os noventa minutos. «Non vou responder a esa pregunta, non teño forma de facelo» foi a contestación do técnico portugués cando se lle preguntou se o deste mediodía podía ser o seu último partido como técnico celeste: «Cometemos algúns erros que nos custaron o partido. Co 99 por cento non imos gañar nada, hai que dar o cento por cento para gañar».
«Houbo fases dentro do partido que condicionaron o resultado final. O 0-1 é un erro claro noso e fíxonos dano. Os erros en LaLiga páganse e nós cometémolos na primeira parte», comentou na súa comparecencia ante os xornalistas. Cardoso agradeceu o «esforzo» dos seus futbolistas, porque o pelexaron ata o último minuto», e dixo que el segue crendo que o Celta pode saír da zona perigosa na que se atopa.
«O Levante puxo a súa liña defensiva no medio do campo e a naturalidade dos nosos xogadores non nos facilita xogar con profundidade», xustificou o luso, quen, 24 horas despois de restar importancia á ausencia de Aspas e Maxi Gómez, xustificou a titularidade de Brais Méndez como falso nove porque «non teño outra solución».
