Só seis equipos de Primeira enlazaron tres ou máis triunfos esta liga; o último refacho céltico data de principios de ano
11 dic 2018 . Actualizado ás 05:00 h.Cando os primeiros aires do desencanto -e a ameaza clasificatoria- azoutaban ao Celta , chegaron as vitorias sobre o Huesca e o Vilarreal. Dous triunfos tan distintos como necesarios que insuflaron ánimo e renovado a ilusión dun equipo que agora volve mirar máis cara a Europa que cara á zona de descenso.
Dúas vitorias seguidas obraron a maxia e o reto dos celestes é encadear unha terceira, aínda que a tarefa será moi complicada co Leganés polo medio. Na actual tempada, só seis dos vinte equipos que compoñen Primeira División encadearon tres ou máis vitorias, o que dá mostra da elevada competencia que preside o balompé español. Ademais, desde o regreso do Celta á elite, unicamente en tres ocasiones conseguiu superar tres ou máis contendas en liga co signo da vitoria.
Foi con Luis Enrique aos mandos, na campaña 2013/14, cando o Celta de Nolito, Mallo, Rafinha e compaña regalou á súa afección un tramo ligueiro en grao sumo florido. Foi co campionato languidecendo e o equipo con velocidade de cruceiro. Entre a xornada 34 e a 37 sumou triunfos a costa do Almería (2-4), o Valladolid (4-1), o Osasuna (0-2) e o Real Madrid (2-0), unha vitoria de prestixio para despedir o ano en casa.
Coa chegada de Berizzo, o Celta especializouse en arranques de signo positivo. No primeiro ano non perdeu ata a sétima xornada e no segundo ata a novena, pero o Toto tivo que agardar ao seu último curso en Vigo para ver como o seu equipo encadeaba tres triunfos no campionato regular. O 2-1 sobre o Sporting de Xixón abriu o refacho, o 0-2 en Cornellá deulle continuidade e o 4-3 ante o Barcelona, outro partido para a historia, pechouna.
O recordo máis recente da parroquia celtista dun refacho vitorioso data de principios deste ano. Juan Carlos Unzué estaba á fronte do equipo, que o 14 de xaneiro, cun 0-1 sobre o Levante, comezaba un tamo que continuaría coa vitoria 1-2 en Anoeta fronte á Real Sociedade e o 3-2 co que dobregou ao Betis.
Os refachos están caras
Acadar un refacho de tres triunfos seguidos converteuse no reto de moitos equipos de Primeira, pero só uns poucos lográrono na actual campaña. Concretamente, seis.
O Barcelona, a pesar de non estar a funcionar como a trituradora de campañas anteriores, é o equipo máis regular da categoría. Comezou a liga encadeando catro triunfos e entre a xornada 9 e a 12 enlazou outros tres. Agora aspira a un novo refacho de tres éxitos seguidos.
O Sevilla tamén logrou catro vitorias consecutivas (da quinta á oitava xornada), o mesmo que o Levante (da sétima á décima) e o Valladolid , que comezou a súa serie triunfal tras romper a súa mala dinámica cun empate en Vigo.
As tres primeiras xornadas tiveron para o Real Madrid -entón de Lopetegui- signo positivo, mentres que o Alavés encadeou tres vitorias entre a terceira e a quinta etapa. O Celta quere sumarse a ese club de boas series.