O pequeno de sete anos que se fixo celtista polo capitán puido coñecerlle onte na visita do Celta ao Sevilla
08 oct 2018 . Actualizado ás 13:13 h.Non puido ser tras unha vitoria, pero o pequeno Pepe Arcos, sevillano de sete anos, cumpriu onte o seu soño de coñecer a Hugo Mallo. Despois de que a súa historia se publicase en Bancada de Río, o capitán aproveitou a visita ao Pizjuán para contactar coa familia do pequeno, de maneira que á conclusión do partido puideron atoparse e o de Marín regaloulle unha camiseta ao pequeno celtista.
«O pobre quería preguntarlle tantas cousas e quedou tan impresionado que apenas podía reaccionar», conta o pai do neno, Antonio Arcos, que quedou tan encantado como Pepe co encontro entre ambos e coa actitude do lateral do Celta . «Para un neno desa idade é moi forte atoparse co seu ídolo e que se mostre tan ameno e aberto como o fixo Hugo».
Pepe acudiu ao partido cos seus pais e a súa irmá, alleo ao que ía pasar. «Hugo sacou varios córneres preto de onde estabamos e el estaba embobado». A familia decidira que o encontro posterior fose sorpresa para el, que no estadio ía de celeste rodeado de afeccionados branquivermellos. «Alucinó co gol de Boufal, tiña sentimentos atopados porque o Sevilla podía ser líder», conta.
O mellor, e pese ao resultado, estaba por chegar. «Cando saíu Hugo pola porta el estaba expectante e a súa irmá comezou a berrar. No momento en que se achegou a nós, deulle a man e acariñoulle a cabeza el xa se puxo branco, non era capaz de falar, tremía con monosílabos», relata Antonio. Unha vez que lle deu a camiseta, «aferrouse a ela como un tesouro e Hugo ría dicíndolle que lla puxese cando fose maior». Hoxe levoulla ao colexio para que a visen os seus amigos.
Arcos pai non sabe como expresar a súa gratitude ao futbolista: «Este home fai grande a palabra capitán, demostrou ser unha gran persoa», afirma. Aínda que o celtismo inicialmente era cousa do seu fillo, el tamén se considera xa practicamente un afeccionado máis: «Agora o Celta ten ocupado un pedazo importante do noso corazón». Agora xa están programando a viaxe a Vigo en febreiro para gozar en directo do Celta -Sevilla.
