O uruguaio, que asinou un inicio espectacular no 2017, será titular no Celta a pesar de estar sen minutos
18 ago 2018 . Actualizado ás 05:00 h.Ningún dos sete fichaxes, dos que tres serán titulares, centraban o foco para a estrea ante o Espanyol. O interese estaba centrado en ver saltar ao campo a Lobotka e a Maxi Gómez, os dous reis do mercado celeste, e ambos estarán esta tarde na estrea ligueira. O charrúa tras recibir unha alta exprés despois de chegar lesionado do Mundial e sen ter disputado un só amigable. Un síntoma máis de que o seu futuro inmediato está en Vigo.
Os finais do verán alimentan a historia de Maxi no vello continente. A mediados de agosto de 2017 ninguén contaba co uruguaio. Acababa de chegar e era o suplente de Guidetti para a posición de nove, pero o sueco lesionouse, Unzué recorreu a el, marcou dous goles ante a Real Sociedade na estrea e acabou a tempada con 18 dianas e como un dos mellores cabeceadores de Europa.
Un ano despois ninguén contaba tampouco con el, aínda que por lesión. O cidadán de Paysandú foi o último en chegar a Vigo tras disputar o Mundial de Rusia con Uruguai e acadar os cuartos de final. Arribou lesionado cunha escordadura no ligamento lateral do xeonllo dereito e dedicouse nas últimas tres semanas a apurar a súa recuperación. Finalmente o dianteiro recibiu a alta, entrou na convocatoria e Mohamed deulle a bendición como titular. O reto agora é repetir o arranque do curso pasado pero que os seus goles dean puntos.
Maxi será un dos focos de atención nun partido de noves, porque o morbo está servido coa presenza de Borja Iglesias no cadro rival despois de pasarse os últimos anos como xogador céltico, primeiro no filial e o último curso como cedido no Zaragoza. O compostelán será unha das principais ameazas.
A contenda tamén exerce de cartón de presentación para o proxecto de Mohamed na sétima tempada consecutiva do Celta en Primeira. Despois dun verán sen éxitos, marcado polas lesións e pola chegada graduada dos xogadores, o técnico arxentino ten que facer bo o seu tradicional arranque para darlle un impulso á súa idea.
En función dos homes que escolleu, todo indica que apostará por un 4-2-1-3 como sistema táctico, con Beltrán e Lobokta no dobre pivote e con Brais Méndez actuando como media punta en ataque e tapando a banda dereita en defensa para liberar máis a Iago Aspas, que en teoría partirá desde un costado. Brais está ante un ano definitivo para a súa carreira deportiva e o mosense acelerou o paso para facerse cun oco na primeira pole.
Tres dos novos
En canto a nomes propios, tres dos sete fichaxes terán un sitio no verde desde o principio, todos eles de corte defensivo: Araujo estará no centro da defensa e Júnior Alonso saltará ao campo tan só tres días despois de chegar a Vigo. Beltrán, que se gañou o respecto de todos nos dous partidos que disputou completará o trío. O seseñero compartirá dobre pivote con Lobotka coa misión de taparlles as costas aos seus novos compañeiros.
O Espanyol chega a Vigo despois dun verán inmaculado con seis vitorias noutros tantos partidos e cun cambio de proposta radical da man de Rubi. A orde e contragolpe dos últimos anos ha deixado lugar ao fútbol combinativo e ao protagonismo a través do balón. O Celta non está disposto a deixarllo. Mohamed quéreo para atacar desde o principio. Para disipar dúbidas gañando o primeiro partido da tempada.