Terá ficha do filial e adestrará co primeiro equipo
17 ago 2018 . Actualizado ás 13:38 h.Un ano despois, Iván Villar dá un paso atrás. O canteirán foi a sorpresa no verán do 2017 cando se acolleu ao seu dereito de ser membro do cadro de persoal do primeiro equipo a pesar de que desde o club crían que o mellor era que continuase no B. Un ano despois, sen ter tido minutos nin no primeiro equipo nin tampouco na súa cesión ao Levante, o gardameta de Aldán aceptou pórse ás ordes de Rubén Albés.
Esta mañá o Celta anunciaba que Júnior Alonso levaría o dorsal 25 co que esta mesma mañá adestraba, como vén facendo durante a pretemporada, Iván Villar. Podía pensarse nunha marcha, pero Mohamed encargouse de revelar que en realidade o que ocorría e explicou que foi el mesmo quen lle fixo ver ao canteirán que era a mellor opción.
«Díxenlle: 'Se queres ir a outro lugar para ser suplente pódelo facer, pero aquí podes competir e ter minutos no filial e adestrar connosco'. Entendeuno e aceptou sen problemas», revelou o adestrador. Ademais, adiantou tamén que Villar irá a banco mañá como suplente de Sergio ante a lesión de Rubén Blanco .
A propósito da opción de reforzar a portería, deixou entrever que era unha petición súa que o club decidiu non atender. «Falouse coa directiva, fixemos o pedido que queriamos facer e eles deciden o armado. Estou contento co que teño, si me gustou nalgún posto ter algunha opción máis».