O xogador do filial volveu competir onte no triangular de Moraña
29 jul 2018 . Actualizado ás 14:30 h.A primeira tempada de Alberto Solís co Celta B en Segunda B truncouse o 15 de outubro do ano pasado, na xornada 9 e tras xogalo practicamente todo. Unha rotura de ligamento cruzado de xeonllo fronte ao Fuenlabrada acaboulle supondo nove meses sen pisar os terreos de xogo. Pero o canteirán está de volta. O triangular deste sábado supuxo o seu regreso tras un longo calvario.
«Despois de moito tempo, volvín competir, volvín ao sitio onde son eu, volvín sentirme futbolista. Máis de noves meses despois volvín ao verde», comentaba Solís en Instagram, engadindo unha mensaxe de agradecemento: «Grazas a toda a xente que estivo ao meu lado, en especial aos meus pais, os meus irmáns e a estes dous fenómenos, Manu Ricis e Fran Comesaña», en referencia aos seus dous acompañantes na imaxe. «Grazas por achegarme e ensinarme tanto. Cunha ilusión enorme pola tempada que se nos aveciña. Gozaremos moito», concluíu.
A tempada do filial de Rubén Albés, con Solís de volta, comezará o 26 de agosto en Barreiro recibindo ao Guijuelo, o mesmo rival fronte ao que se clasificaron para o play-off a pasada campaña. A súa primeira saída afrontarana a semana seguinte en Abegondo fronte ao Deportivo.