O Celta B disputou o seu segundo play-off seguido e oito dos outros dez equipos foron campións de Liga con rexistros goleadores espectaculares
11 jun 2018 . Actualizado ás 14:14 h.A eliminación do Celta B na segunda rolda do play-off de ascenso a Segunda puxo fin aos compromisos oficiais da canteira na tempada 2017/2018, un curso sobresaliente para os equipos da Madroa. Salvo o equipo de Rubén Albés, o Xuvenil A e o Alevín A, que tamén ofreceron un gran rendemento, todos os demais conxuntos se proclamaron campións de Liga , a maioría deles con gran autoridade, cifras goleadoras de vertixe e poucos goles encaixados. Ademais, o gran triunfo da canteira chámese seguramente Brais Méndez, que se uniu no primeiro equipo a Iago Aspas, Sergio Álvarez, Rubén Blanco , Hugo Mallo e Jonny.
Celta B, segundo play-off en dous anos
Nun ano de cambios, con novo adestrador e revolución total no persoal, o filial celeste conseguiu non só meterse no play-off como o ano anterior co histórico Panda Team, senón superar a primeira rolda, cousa que non lograra o conxunto de Alejandro Menéndez. Con Juan Hernández como máximo goleador, Drazic dando un paso atrás para xogar en Segunda B e o capitán, Kevin, chamando ás portas do primeiro equipo con grandes partidos, o equipo meteuse no play-off na última xornada sen depender de si mesmo.
Xuvenil A, terceiro posto nun ano de cambios
Un caso parecido ao anterior no que se refire a técnico novo -Jorge Cuesta - e moitos futbolistas de primeiro ano no equipo. O adestrador fixara o obxectivo de repetir primeiro posto e, aínda que non puido ser, si se loitou practicamente ata o final. Remataron na terceira praza e varios xogadores como Fran Vieites, Franco Lobos ou Sergio Carreira entraron en convocatorias co filial, no caso de Lobos, dispondo mesmo dalgúns minutos.
Xuvenil B, triunfo loitado ata o final
Os de Claudio Giráldez proclamáronse campións a falta de dúas xornadas tras alternar a primeira e a segunda posición nas últimas semanas da Liga . O Celta Xuvenil B foi o equipo máis goleador de Liga Nacional Xuvenil con 98 goles en 34 partidos dos cales venceron 27, empataron tres e perderon catro, un deles o último cando xa non se xogaban nada. O seu futbolista Alberto Estévez foi o segundo máximo goleador con 26 tantos, seguido de Óscar Gil (21) e ata 17 xogadores distintos lograron polo menos un gol. O seu mellor serie foi de oito vitorias seguidas.
Cadete A, campións deixando escapar só cinco puntos
O Cadete A, baixo a batuta de Álex Otero, proclamouse campión de Liga con once puntos de vantaxe sobre o Deportivo. Foron os coruñeses os que lle arrebataron dous dos cinco puntos deixaron escapar en toda a Liga en División de Honra Cadete (o Val Miñor fíxose cos outros tres). Recibiron só 16 goles en 34 partidos e anotaron un total de 195, 29 deles obra do segundo máximo goleador da categoría e primeiro celeste, Alejandro Calviño. No top-ten de máximos anotadores coáronse tamén Miguel Rodríguez, Fran López e Hugo Suárez. 19 futbolistas diferentes lograron polo menos un gol.
Cadete B, quince puntos de vantaxe sobre o segundo
Outro campión que se proclamou como tal con autoridade foi o Cadete B de Srdan Bajcetic. 29 vitorias, tres empates e dúas derrotas traducíronse en 90 puntos en 34 xornadas, quince máis dos que conseguiu adxudicarse o segundo clasificado, o Ourense Cf. Tamén nesta categoría tivo cor celeste o segundo máximo goleador da Liga , Jesús Ares con 32 dos 164 goles que fixo o equipo por medio de 18 xogadores entre os que tamén destacan Erik Bugarín (28), David Vilán (20), Brais Penela (17) e Yago de Santiago (15). Ninguén marcou máis goles (164) nin recibiu menos (18).
Infantil A, campión con pleno de vitorias
Nin un só punto deixou escapar o Infantil A de Liga Galega. Na primeira fase venceu os 17 partidos para quedar primeiro con sete puntos máis que o Val Miñor, 162 goles a favor e oito en contra. Máis do mesmo no play-off polo título, con 14 vitorias de 14, 62 goles a favor e oito en contra. En ambas as fases o máximo goleador foi Álex Comparada, cun total de 87 goles nos 29 partidos nos que interveu.
Infantil B, máis de 200 goles en 34 partidos
Once puntos de vantaxe sobre o segundo clasificado, o Porriño Industrial, deron o título de Primeira Infantil ao Celta B de Álex Calvo. Os celestes gañaron 33 dos 34 partidos de Liga e só perderon ante o terceiro clasificado, o Val Miñor. Marcaron un total de 238 goles e recibiron 17.
Alevín A, vencedor invicto
O Alevín A só deixou escapar dous puntos, os do empate fronte ao Porriño, que foi o terceiro clasificado, na xornada 18. Sacaron 19 puntos ao segundo, o Areosa, e marcaron 253 goles, recibindo unicamente 14 goles en 30 xornadas.
Alevín B, subcampeonato para o equipo menos goleado
Se na primeira fase o Celta Alevín B impúxose no pulso co Santa Mariña, na segunda polo título acabou sendo o rival o que levou o gato á auga. A diferenza estivo no duelo directo entre ambos, o único no que os celestes perderon puntos. Encaixaron en toda a liga só tres goles, os tres fronte ao Santa Mariña, e en ningún quedaron sen anotar.
Os benxamíns, dous campións intratables
O Benxamín A gañou 29 partidos en 30 xornadas, empatando soamente o restante e avantaxaron en seis puntos ao Val Miñor. O B non coñeceu a derrota na segunda fase e tamén sacou seis puntos ao seu máis inmediato perseguidor, o Areosa.
