O perfil de Brais Méndez é o dun xogador moi talentoso, ten esa esencia de bo pase, tanto curto como longo, e ten desequilibrio nos últimos 30 metros con ese pase. Iso convérteo nun xogador diferente, de quilates, ademais ten gol. Atesoura moita calidade técnica e as ideas moi claras.
Na miña etapa creo que adquiriu madurez, traballo defensivo, traballo táctico colectivo no que non só facer o seu xogo e o seu partido, senón encadear ese fútbol que ten co do grupo. Creo que foi no Celta B onde progresou nese sentido e converteuse nun futbolista moito máis completo. A partir de aí, ao ir entrando en Primeira División, pois é unha aprendizaxe progresiva que lle vai ir dando pouso para chegar a ser un xogador do primeiro equipo para todos os efectos e adaptado.
Non me colle de novas que estea a responder en Primeira División porque ten todas as ferramentas para estar aí e asentarse. Para crecer é clave saber manexar ben os aspectos mentais, ter a cabeza ben amoblada, e entendo que o está facendo, por iso é polo que non me sorprende que o seu rendemento en moitos momentos sexa óptimo.