O persoal dedicou a vitoria aos afectados polos incendios
17 oct 2017 . Actualizado ás 14:07 h.Ás camisetas con mensaxe de repulsa -«dor e rabia»-, os brazaletes negros e o minuto de silencio, medidas anunciadas antes do As Palmas-Celta polos dous equipos polos incendios que arrasaron Galicia, sumáronse as dedicatorias dos xogadores e do técnico, Juan Carlos Unzué, ao finalizar o partido. Ademais, o persoal fotografouse no vestiario cunha das camisetas que luciran nos prolegómenos.
Unzué: «A vitoria vai dedicada á nosa xente»
O técnico do Celta destacou en rolda de prensa que o triunfo ante o As Palmas tiña un significado especial. «Vai dedicado á nosa xente, en especial aos afectados máis directamente», dixo. Dadas as circunstancias, o partido non era un máis. «A sensación era de preocupación como non podía ser doutro xeito. Ao final temos alí á familia, a xente coñecida. A túa cidade está a piques de arder, esaxerando un pouco, pero case».
E quixo profundar o técnico en como se sentiron ao vivir na distancia o que ocorría en Vigo. «Pprimero sentimos preocupación, logo rabia e tamén incredulidade, porque non pode haber unha razón ou interese que se poña por diante da vida dun ser humano. Non o comprendo», expresou.
Sergio: «Síntome orgulloso de formar parte de Galicia»
«O que máis feliz me fai son os tres puntos e poder adicarllos á xente que o pasou mal, aos que estiveron axudando, a quen perderon as súas casas. Isto é un pequeno xesto para eles. Síntome orgulloso de formar parte de Galicia», comentou o porteiro de Catoira aos micrófonos da Radio Galega. Comentou que tiña amigos afectados e que o vivido é das peores cousas que poden pasar. «Esperamos que esta pequena alegría lles saque un sorriso».
Jonny: «Enviamos moita forza»
Jonny, pola súa banda, quixo mandar «todo o apoio» aos afectados e tivo un recordo para «as catro vítimas e as súas familias». «Foi duro para todos, unha noite longa. Nós estabamos aquí pendentes dos móbiles, non imaxino como o pasaron alí. Enviamos moita forza». Ademais, valorou que o ter permanecido unidos ante a traxedia «fai máis fortes a Vigo e a Galicia».
Sergi: «O triunfo foi desde a rabia que levabamos dentro»
O central Sergi Gómez asegurou ter sentido «impotencia» a medida que chegaban noticias do que estaba a ocorrer en Vigo. «Este triunfo foi merecido pola rabia que levabamos dentro. Mandamos forza á xente que está a sufrir e que viviron de preto un momento tan arrepiante como este», indicou.
Ademais, a través das redes sociais houbo máis mensaxes doutros membros do persoal como Brais a través dunha historia de Instagram ou Daniel Wass: «Ninguén se merece vivir isto».