Os vigueses, dirixidos por Eusebio, acurralaron aos colchoneiros no seu campo, aínda que non puideron superar a eliminatoria
21 ene 2017 . Actualizado ás 10:23 h.2010: O Celta de Eusebio Sancristán plantaba cara ao Atlético no Calderón na ida de cuartos de Copa tal día como hoxe. E facíao sendo equipo de Segunda e cun equipo infestado de xogadores galegos, a maioría canteiráns, que xa sorprendera ao Vilarreal na anterior rolda.
O once céltico estivera formado por Yoel, Vasco Fernandes, Noguerol, Túñez, Roberto Lago, Vila, Michu, Trashorras, Abalo, Iago Aspas e Botelho. Trashorras era o encargado de abrir o marcador cando só transcorreran tres minutos de partido e Tiago empataba pouco despois (minuto 11). Pero o recordo que quedou daquel partido, máis aló de que os celestes non superasen a eliminatoria, foi o dun Celta que bailou ao Atlético no seu campo e que, ademais, viu como Undiano Mallenco non sinalaba un penalti claro sobre Michu.
Os vigueses tiveron o balón e tiraron de descaro mentres os colchoneiros, entón dirixidos por Quique Sánchez Flores, limitábanse a defender e agardar á contra. Ben colocados e sen perder a compostura, os vigueses encaixaran o seu único gol de estratexia. Dani Abalo e Trashorras desperdiciaron algunhas ocasións claras.
Na volta, en Balaídos, unha vitoria pola mínima dos madrileños (0-1, Forlán aos 26 minutos) acababa co soño copeiro do Celta 2009/2010.