Juanfran, Gustavo López e Jesuli marcaron nun Balaídos abarrotado
05 may 2020 . Actualizado ás 09:26 h.O Celta de Víctor Fernández impúñase tal día como hoxe a un Real Madrid que chegaba a Balaídos como líder a falta de cinco xornadas e que remataría sendo o campión de Liga do curso 2000/2001. Os vigueses finalizarían a tempada na sexta praza que tamén ocupaban xa naquel momento.
Os celestes levaron un partido máis cómodo do que cabía prever. Con Del Bosque no banco madridista, os brancos apenas opuxeron resistencia e xa no minuto 8 un tanto de Juanfran adiantaba aos locais, que se foron con 2-0 ao descanso grazas a un tanto logrado por Gustavo López de falta directa. A vantaxe definitiva chegou xa no 93, por mediación de Jesuli. Unha de ocasiónelas merengues máis claras tívoa precisamente un canteirán céltico, Míchel Salgado, que xa comentara na previa que en caso de marcar, non o celebraría.
O once vigués naquel choque formárono Pinto, Velasco, Cáceres, Djorovic, Juanfran, Vagner, Giovanella, Edú, Mostovoi, Gustavo e Catanha. Jesuli saíra no 88 para anotar xusto antes do final, mentres que Jayo e Couñago saíron tamén desde o banco. Polo Madrid, Del Bosque elixiu, xunto con Míchel, a Iker Casillas, Helguera, Iván Campo, Roberto Carlos, Flavio, Celades, Figo, Raúl, Solari e Savio.