Por que rebentan as croquetas na tixola?

L. G. V.

TRUCOS

cedida

Se tes preguntas sobre nutrición, receitas ou mesmo protocolo na mesa, deixa a túa consulta na caixa de correos gastronomia\lavoz.es e os profesores do Centro Superior de Hostalería de Galicia sacaranche de dúbidas

07 ene 2021 . Actualizado ás 13:46 h.

Achéganse días de festexos e enchentes, e ninguén quere ser o torpe que se equivoca coas cantidades ou que, cando explica a súa encomiada receita, confunde termos como marinar con macerar. Se queres manter a recado a túa reputación de chef da familia máis vale que comeces a ter claros certos conceptos e, sen temor, preguntes todas as dúbidas que che asalten. Para iso, tes á túa disposición a caixa de correos gastronomia\lavoz.es. Nesta conta recompilamos as preguntas sobre nutrición, protocolo na mesa ou receitas e enviámosllas aos profesores do Centro Superior de Hostalería de Galicia (CSHG). Como ti, outros cocinillas trasladáronnos as súas inquietudes. Moitas, que probablemente ti tamén compartas.

Por que rebentan as croquetas cando se friten?

Pola mala homogeneización da bechamel e pola temperatura do aceite. É dicir, no caso da bechamel porque non estiramos ata que queda suficientemente homoxénea. No caso do aceite, porque a temperatura non sido a idónea: 180 graos.

Como podemos evitar chorar coa cebola?

Ao cortar e picar a cebola temos que procurar usar un coitelo ben afiado para que solte a menor cantidade de auga. Outro punto a ter moi en conta é que ao cortar a cebola debemos manternos ergueitos; deste xeito evitaremos que os ollos estean preto dos efluvios da cebola.

Cal é a diferenza entre marinar e macerar?

Xeralmente emprégase macerar cando se mergullan froitas en licores ou viños para que tomen o seu sabor.  Marinar, con todo, adóitase utilizar para carnes (sobre todo a caza) e peixes. O marinado, ademais, pode ser líquido, seco, ou instantáneo. Falamos de líquido para referirnos ao proceso de mergullar produtos en viño, licores ou herbas aromáticas. Fálase de marinada seca para facer referencia á mestura de azucre e sal, cando se pon sobre o produto. A instantánea, pola súa banda, é aquela a a que se lle engaden cítricos ao momento. Adoita tratarse de peixes e mariscos aromatizados tamén con herbas.

Teñen data de caducidade os produtos cocidos que conxelamos? Por exemplo os grelos, en canto tempo deberiamos consumilos?

A conxelación permítenos aumentar a vida útil dos alimentos durante moito tempo, pero para garantir as súas cualidades organolépticas e nutritivas é necesario realizar o proceso con garantías de calidade e respectando uns tempos, xa que a maior tempo peor calidade. No caso das verduras de folla verde, como os grelos, podemos consumilos nun prazo de ata 10 meses, e o ideal é conxelalos previo lavado e escaldado (mergullalos en auga fervendo durante 1 minuto), e unha vez que arrefríen, conxelalos.

É máis saudable como guarnición o arroz branco ou a quinoa?

O arroz branco é un cereal e a quinoa un pseudocereal. Se se queren comparar propiedades, moi similares, debería pórse ao lado o arroz integral, non o branco (é máis refinado e ten menos fibra). O ideal e saudable é alternar o consumo de quinoa co de arroz integral e outros cereais integrais, e non darlle todo o protagonismo a un concreto.