Nun recuncho afastado da mirada dos curiosos, pero no corazón da cidade coruñesa, asentouse un restaurante que incorpora un novo concepto ao mapa gastronómico galego
29 oct 2018 . Actualizado ás 17:25 h.Nun recuncho afastado da mirada dos curiosos, pero no corazón da cidade coruñesa, asentouse un restaurante que foxe da mesa tradicional e incorpora un novo concepto ao mapa gastronómico galego. Eclectic é o nome da aposta que lideran desde fai tres anos o arxentino Sergio Musso e o catalán Paco Chicón. Funcionan só previa reserva e a súa carta ofrece tres tipos de menú que varían mes a mes, para adaptar os seus pratos aos produtos de tempada. O Eclectic importa conceptos propios das grandes cidades. O persoal de traballadores é flotante, segundo a demanda. E a cociña adáptase á demanda de cada día grazas a que é necesario reservar para poder comer nun cómodo salón que acrecenta o carácter hogareño do local presidido por unha biblioteca e unha ampla colección de esculturas de vidro da artista coruñesa Julia Ares. Musso e Chicón comparten espazo nos fogóns e trasladan unha fusión das experiencias acumuladas ao longo do seu percorrido vital polos cinco continentes. Chegaron a esta beira do Atlántico case por casualidade. Ían buscando unha casa rural para facer un hotelito e acabaron nos arredores de María Pita atraídos pola luz do Finisterre e a calidade do próximo mercado de San Agustín no que enchen a súa despensa cada día. Nos menús, de pratos abundantes, destacan as mesturas de sabores que esbozan un completo mapa da gastronomía galega. Para non perderllo.