Aos galegos gústalles, e moito, esta estraña combinación. De feito, unha cadea analizou os seus pedidos e, na comunidade, é a que máis lle demandan. Neste artigo presentamos os locais favoritos de quen pensabamos que eran uns «rara avis»
04 jun 2021 . Actualizado ás 15:23 h.Pouco lle pega a un canadense meterse en leas. E, con todo, hai que viaxar ata Ontario para atopar un dos pratos máis controvertidos da cultura gastronómica pop. A pizza con piña, que fai sangrar o padal de calquera italiano que se prece, inventouna o cociñeiro de ascendencia grega Sam Panopuoluos nos anos 60. Parece ser que tamén intentou situar esta froita nunha hamburguesa. Non é ningún spoiler dicir que non callou.
A pesar de que a maioría tacha a este invento de aberración, por algo será que a pizza tropical ou hawaiana aparece en practicamente todas as cartas das pizzerías galegas. Hai uns meses revelouse o misterio: esta combinación é máis demandada do que poida parecer e, de feito, un informe de Telepizza no que analizaba os pedidos dos seus clientes puxo sobre aviso a navegantes: en Galicia é a pizza máis consumida desta cadea. Máis aló desta franquía pequenos locais deben a súa fama, en parte, a ter conseguido facer da súa pizza con piña un estandarte. Empezamos.
Lugano (Vigo)
Esta pizzería de Vigo, que leva catro anos aberta, xa fixo da súa pizza con piña un clásico. Mari Carmen, propietaria do local, explica que ademais da versión Fantasía (con xamón cocido, mestura de catro queixos, champiñóns e ovo) a máis demandada é a pizza con piña, e xa advirte, «aínda que poida parecer que non se pide». «No noso caso leva mascarpone, rúcula e xamón york. A cremosidad e o frescor da piña, xunto ao toque crujiente da verdura, creo que é o que a fai especial». Outros locais que indican amantes da opción hawaiana na cidade olívica indican que as mellores están en Abadían de Nuria e Bocatería L'esquinas. No entanto, como a idade é un grao, cabe indicar a indicación de Eliseo Blanco , un vigués de 91 anos cuxo prato favorito é, precisamente, a pizza con piña. El non pasa sen a «do sitio do teléfono vermello que hai na neveira (Telepizza)».
Enzo's (A Coruña)
Este restaurante tradicional italiano é especialmente popular na cidade herculina pola súa combinación con froita. «É unha das que máis vendemos a pesar da súa mala fama. Dámoslle o toque de que a salsa de tomate é caseira, ten moitas especias, allo, alfabaca, e isto contrasta co toque doce da piña». Sen complexos, neste local apostan pola innovación no prato italiano máis recoñecido do mundo, a pesar de que no país da bota empéñanse en reivindicar que na sinxeleza radica a clave do seu éxito. En Enzo's un pode atopar pizza de foie, de carpaccio ou de cogomelos e trufa negra.
Dolce Vita (Lugo)
«Para consumir a atípica pizza con piña en Lugo hai que recorrer á franquía de comida italiana Dolce Vita. A maioría dos restaurantes italianos que hai nesta cidade resístense a utilizar a piña nas súas pizzas. En cambio, desde Dolce Vita, situada na Avenida da Coruña, afirman que é unha variedade que sempre hai que ter, explica a redactora de La Voz en Lugo, Uxía Carreira. «Aínda que non é a estrela, sempre é demandada polos lucenses», dille un empregado á xornalista. As pizzas de Dolce Vita diferéncianse por estar realizadas de forma artesanal e pódense consumir a domicilio ou por porcións no local. O tamaño familiar da Pizza Hawaiana ofértase por 15,90 euros.
Sicilia in Bocca (Santiago)
A xornalista Patricia Calveiro, da delegación de La Voz en Santiago, mantén que na capital galega se un quere pizza con piña o mellor é que se achegue a Telepizza ou Domino's. Aínda que para os que prefiran visitar negocios locais, preparado con masa artesanal e elaborado en forno de leña, a alternativa perfecta é a cefalú de Sicilia inBoca , como tamén a hawái do restaurante L'Incontro, dirixido por Michela, unha italiana da rexión de Puglia. Recoñece o dono de Sicilia in Bocca, Dominco Bartolotta, que a pizza con piña pídese moito, pero que el como italiano (de Palermo) e devoto da cultura de pizza «nunca a pediría se vou comer a un restaurante». Explica que esta combinación de doce e salgado «é un estilo máis americano, pero nunha pizzería tradicional de Italia nunca mesturarían, por exemplo, beicon, piña e salsa de tomate. Polo menos, non é o usual».
En Pizza Rao, que ofrece un longo catálogo de máis de medio centenar de variedades, só unha inclúe piña (a tropicale), que se combina con catro básicos como o tomate, a mozzarella, o xamón e o orégano. Con todo, para a sobremesa si arriscan cunha calzone doce, na que mesturan crema de cacao, piña e plátano.
